Американинг NBCUniversal медиа корпорациясининг сотувлар бўйича собиқ директори Линда Яккарино Twitter’нинг янги бош директори бўлди. Бу ҳақда Twitter эгаси Илон Маск маълум қилди.
“Мен Линда Яккаринони Twitter’нинг янги бош директори сифатида таништираётганимдан хурсандман. Мен Линда билан платформани универсал иловага айлантириш учун ҳамкорлик қилишни сабрсизлик билан кутаман”, — деб ёзди Маск Twitter’да.
Маскнинг таъкидлашича, Яккарино бизнес жараёнларига, ўзи эса янги технологиялар ва маҳсулот дизайнига эътибор қаратади.
Линда Яккарино ҳақида нималар маълум?
Линда Яккарино 1963 йилда Нью-Йоркда туғилган. 1985 йилда у Пенсилвания университетини тамомлаган ва у ерда гуманитар фанлар ва телекоммуникация соҳасидаги фаолиятни ўрганган. У медиа индустриясидаги фаолиятини NBCUniversal’нинг медиа режалаштириш бўлимида стажёр сифатида бошлаган.
1992 йилдан бери у Turner Entertainment мултимедиа компаниясида ишлаган, у ерда дастлаб ижрочи вице-президент, кейин эса реклама савдоси бўйича бош операцион директор сифатида фаолият юритган. У 2011 йилда NBCUniversal’га қайтган. Дастлаб у савдо, кабел телевидениеси ва рақамли реклама, 2012-2020 йилларда эса реклама ва мижозларга хизмат кўрсатиш бўлимига раҳбарлик қилган. 2020 йилда у глобал реклама бўлимида ҳамкорлик бўйича директор бўлди. Рекламани қўллаб-қувватлайдиган Peacock стриминг хизматини ишга туширишда муҳим рол ўйнаган.
У Суперкубок ва Олимпиада каби йирик спорт тадбирларининг трансляцияларини назорат қилган ва Snapchat, YouTube, Twitter каби йирик технология компаниялари билан ҳамкорлик қилган.
The Wall Street Journal маълумотларига кўра, NBCUniversal’даги фаолияти давомида Яккарино хонимнинг 2000 кишидан иборат жамоаси реклама сотишдан 100 миллиард доллардан кўпроқ даромад олган.
Изоҳ (0)