Маданият ва туризм вазирлиги “Ишлаб чиқариш корхоналари ходимларининг иш вақти ва дам олиш кунларини мазмунли ўтказиш ҳамда маданий савиясини янада ошириш чора-тадбирлари тўғрисида”ги ҳукумат қарори лойиҳасини муҳокамага қўйди.
Ҳужжат лойиҳаси билан республикада мавжуд барча ишлаб чиқариш корхоналарига иш куни бошланиши ва тугаши пайтида миллий куй ва қўшиқлар, шу жумладан, мақомнинг эшитилиб туриши амалиётини йўлга қўйиш тавсия этилмоқда.
Буни йўлга қўйиш бўйича Маданият ва туризм вазирлиги томонидан тавсия этилган асарлар рўйхати иловага мувофиқ тасдиқланади.
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари:
- ишлаб чиқариш корхоналарида иш куни бошланиши ва тугаши пайтида миллий куй ва қўшиқлар, шу жумладан, мақомнинг эшитилиб туришини йўлга қўяди;
- зарур бўлганда, корхонада миллий қадриятларни тараннум этувчи куй ва қўшиқлар эшиттириб борилиши учун радиоузел ташкил қилиш бўйича ишлаб чиқариш корхоналари муассислари билан ҳамкорликда ишларни олиб боради.
Маданият ва туризм вазирлиги ҳудудий бўлинмалари билан биргаликда:
- ишлаб чиқариш корхоналари ходимларининг кайфиятига ижобий таъсир қиладиган, мазкур қарор иловасига мувофиқ тавсия этилган асарлар рўйхатидан иборат мусиқий альбом тайёрлайди (муаллифлик ҳуқуқларига риоя қилган ҳолда) ҳамда ишлаб чиқариш корхоналарига тақдим этилишини таъминлайди;
- номоддий маданий мероснинг ноёб элементлари бўлган бахшичилик, мақом ва аския санъати намуналаридан иборат маданий тадбирлар дастурларини тайёрланади ва ишлаб чиқариш корхоналарида намойиш этилишини таъминланади;
- ҳар ойнинг йигирманчи санасига қадар ишлаб чиқариш корхоналарига улар жойлашган ҳудудда келгуси ойда ташкил этиладиган оммавий-маданий ва концерт-томоша тадбирлари ҳақида маълумот бериб борилади.
Изоҳ (0)