Фарғона вилояти Бағдод туманида ижтимоий тармоқ орқали диний мазмундаги маърузаларни тарқатиб келган шахс жаримага тортилди. Бу ҳақда вилоят Ички ишлар бошқармаси ахборот хизмати хабар берди.
Хабарга кўра, ҳолат 4 январь куни, Ички ишлар бошқармаси ТҚХ ТҚКБ ходимлари томонидан ўтказилган тезкор тадбир давомида аниқланган. Туманнинг Қизилбоғ маҳалласида яшовчи фуқаро М.Р.га тегишли телефон кўздан кечирилганда, Instagram ижтимоий тармоғида профил очиб, ушбу профил орқали диний мазмундаги аудио ва видео маърузаларни тарқатиб келаётган маълум бўлган.
Мазкур ҳолат юзасидан Бағдод тумани ИИБ томонидан Маъмурий жавобгарлик тўғрисидаги кодекснинг 184-моддаси прим 2-моддаси билан ҳужжатлар расмийлаштирилиб, жиноят ишлари бўйича Бағдод тумани судига юборилган. Суд М.Р.ни ҳуқуқбузар деб топиб, унга юқоридаги моддага асосан 900 000 сўм миқдорда жарима жазоси тайинлади.
Аввалроқ Тошкент давлат иқтисодиёт университети талабаси, 21 ёшли Жаҳонгир Улуғмуродов Telegram гуруҳда диний мазмундаги нашида тарқатгани учун 3 йилга озодликдан маҳрум қилиш жазоси тайинлангани ҳақида хабар берилган эди. Мазкур ҳолат кенг жамоатчилик томонидан эътирозларга сабаб бўлди.
Хусусан, фаоллар талабанинг ёшлиги, дўстларига юборган нашиданинг маъносини тушунмай шу ишни қилгани ва берилган жазо ўта оғирлигини қайд этган. Тошкент вилояти ИИББ ахборот хизмати ижтимоий тармоқларда айрим электрон оммавий ахборот воситалари ва виртуал макон фойдаланувчилари орасида “танишларига оддий диний қўшиқ — нашида тарқатган талаба қамалди” мазмунидаги нохолис маълумотлар тарқалаётгани юзасидан муносабат билдирганди.
Изоҳ (0)