Риштон туманида анъанавий Туркий халқлар ҳунармандчилиги форуми ва миллий кулолчилик маҳсулотлари кўргазма-савдоси ўз ишини бошлади. Бу ҳақда “Дарё” мухбири Азизжон Эрматов хабар бермоқда.
Халқаро ҳунармандчилик марказида ўтказилаётган форумда Марказий Осиё республикалари, Туркия, Озарбайжон, Франция, Исроил, Чехия каби давлатлардан келган моҳир уста кулоллар, таниқли маданият арбоблари, санъашунос олимлар иштирок этмоқда.
Форумнинг мақсади жаҳон иқтисодиётида муҳим тармоқ ҳисобланган ҳунармандчиликни кенг тарғиб қилиш, ҳунармандчиликнинг асосий йўналишларидан бири бўлган кулолчилик анъаналари ва мактабларини сақлаш, соҳадаги илмий изланишлар кўламини кенгайтириш, ўзаро тажриба алмашиш, янги иш ўринларини яратиш ва иқтидорли ҳунармандларни рағбатлантиришдан иборатдир.
.JPG)
Форум доирасида “Риштон кулолчилиги: Кеча, бугун, эртага” илмий-амалий конференцияси, “Кулолчилик махсулотларини ишлаб чиқариш ва экспорт қилишда ютуқ ва муаммолар” давра суҳбати, “Анъанавий Риштон кулолчилиги” китоби тақдимоти, кулолчилик маҳсулотлари кўрик-танлови, хорижий ва маҳаллий усталарнинг маҳорат дарслари, халқ сайиллари, концерт дастурлари, кўргазмалар, кулолчиликка оид бадиий ва ҳужжатли фильмлар намойиши, устахоналарга экскурсиялар ўтказилади.
Шунингдек, Риштондаги Бурҳониддин ал-Марғилоний ар-Рошидоний номли истироҳат боғида “Кулоллар сайли” миллий кулолчилик маҳсулотлари кўргазма-савдоси ташкил этилган.
Кўргазма-савдога вилоятлар ва Қорақалпоғистон кулолчилик мактабларининг вакиллари бўлган уста кулолларнинг энг сара асарлари қўйилган.
.JPG)
Изоҳ (0)