Тошкент шаҳар Миробод туманида пул эвазига имтиёзли кредит ажратиш ва ер олиб беришни ваъда қилган шахс қўлга олинди, деб хабар беради Бош прокуратура ҳузуридаги департамент.
Бош прокуратура ҳузуридаги Департаментнинг Миробод туман бўлими томонидан ДХХ билан ҳамкорликда тезкор тадбир ўтказилди. Тадбирда муқаддам фирибгарлик жинояти учун судланган Ғ.Э. фуқаро Г.Г.нинг ишончига кириб, гўёки унга юқори лавозимларда ишловчи танишлари ёрдамида банк муассасасидан имтиёзли кредит ҳамда Чилонзор туманидаги савдо комплекси ёнидан 6 сотих ер майдони олиб беришни ваъда қилгани аниқланди.
У ўз “хизмати” эвазига 22 минг АҚШ долларини фирибгарлик йўли билан қўлга киритиб, ер майдони ҳужжатларини расмийлаштириш эвазига яна 600 миллион сўм беришини айтиб, шундан 20 минг долларни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Ноқонуний ер савдолари
Апрель бошларида Навоийда 80 гектар ерни 1 миллиард сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди. Шунингдек, Қорақалпоғистон Республикаси ва Бухоро вилоятида ер майдонлари савдоси билан боғлиқ фирибгарлик ҳолатлари фош этилган эди.
Изоҳ (0)