АҚШ адлия вазири, бош прокурор Меррик Гарленд илк бор россиялик олигархнинг санкцияларни бузиш оқибатида мусодара қилинган активларини Украинага топширишга рухсат берди, деб ёзади Reuters.
Қайд этилишича, гап россиялик тадбиркор Константин Малофеев ҳақида кетмоқда. 2022 йил апрелда АҚШ Адлия вазирлиги уни Украинада бошланган уруш сабаб Россияга қарши жорий этилган санкцияларни бузишда айблаган. АҚШ ҳукуматининг маълумотларига кўра, Малофеев Қримга қарши сепаратистик кайфиятни қўллаб-қувватловчи россияликларга молиявий ёрдам кўрсатган.
Ўшанда Гарленд “Америка молиявий институтларидан бирининг ҳисобрақамида Малофеев томонидан бузилган санкцияларга дахлдор миллионлаб активларга музлатилганини” маълум қилганди. 2023 йил февралда АҚШ бош прокурори бу пулларни Украина эҳтиёжлари учун ўтказиб беришни маъқуллаган. 10 май куни эса АҚШ Адлия вазирлиги ушбу маблағларга оид “биринчи трансферни” амалга оширган.
“Бу Қўшма Штатлар томонидан мусодара қилинган Россия маблағларини Украинани қайта тиклашга илк бор ажратилиши бўлсада, охиргиси эмас”, — дейди Гарленд.
Константин Малофеевга қарши АҚШ санкциялари
“Сарград” телеканали асосчиси Константин Малофеев 2014 йилдан бери АҚШнинг санкциялари рўйхатида. 2022 йил апрелда унга қарши жарима чоралари кенгайтирилган. Хусусан, йирик тадбиркор бошқарувида бўлган “Траскапиталбанк” ва унга боғлиқ 40 дан ортиқ жисмоний ва юридик шахслар “қора рўйхатга” киритилган.
Апрель охирларида АҚШ Қозоғистон Россияга ёрдам бериши туфайли иккинчи даражали санкцияларга дуч келиши мумкинлигидан огоҳлантирганди. Шунингдек, Ҳиндистон АҚШ санкцияларига тушмаган ҳолда Россиядан қурол олиш йўлини қидираётгани маълум бўлган эди.
Изоҳ (0)