Бирлашган Миллатлар Ташкилоти (БМТ) қатл қилишлар сони ортиб бораётгани ҳақида огоҳлантиришига қарамай, Эрон уч нафар маҳбусни, жумладан, “кокаин султони” сифатида танилган бир кишини осиб ўлдирди. Бу ҳақда Al Jazeera хабар берди.
10 май куни қатл этилганлар Панжак аъзолари, яъни мамлакатдаги “энг йирик кокаин тарқатувчи картел” бўлган. Гуруҳ раҳбари Ҳусайн Панжак 32 ёшда бўлган ва 2014 йилда ўзининг ортиб бораётган бойлигини нишонлаш учун уюштирган зиёфати чоғида бошқа беш аъзоси билан бирга ҳибсга олинган. Ҳибсга олиш вақтида 1 килограмм кокаин, афюн ва метамфетамин мусодара қилинган.
Давлат телевидениесининг қисқача репортажида қўллари кишанланган одамлар кўрсатилган ва асосий гумондор аввал 17 марта ҳибсга олингани айтилган. Олий суд уларга нисбатан ўлим жазо тасдиқлагани ҳақида маълумот берган.
Хорижий инсон ҳуқуқлари ташкилотлари қатл этилган яна икки киши Абдулҳуссайн Эмами Могадам ва Бабак Агай эканини аниқлади. Эркаклар Караждаги Гезел Хесар қамоқхонасида қамоқхона олдида йиғилган оила аъзоларининг раҳм-шафқат сўрашига қарамай, осилган.
Шунингдек, 10 май куни эрталаб Караждаги Ражаи Шаҳр қамоқхонасида яна тўрт нафар исми ошкор этилмаган маҳбус қатл этилган, бироқ Эрон расмийлари буни тасдиқламаган.
Мизан нашри исм-шарифи ошкор этилмаган “халқаро наркотик контрабандачиси” қатл этилгани ҳақида хабар берди, бироқ бу Панжакка тегишлими ёки йўқми, аниқ эмас. Унда айтилишича, эркак бир неча Европа давлатларига, жумладан, Нидерландияга наркотик моддалар контрабандаси бўйича учта халқаро гуруҳга раҳбарлик қилган ва расмийлар ундан 750 килограмм героинни мусодара қилган.
“Жирканч” рекорд
БМТнинг инсон ҳуқуқлари бўйича бош котиби Волкер Турк Эронда бу йил қатл қилиш бўйича “жирканч” рекорд кузатилгани, ҳар ҳафта ўртача 10 дан ортиқ одам осилишини айтди. Ташкилот баёнотида 2023 йилда 210 дан ортиқ одам қатл этилгани, аммо ҳақиқий рақам бундан ҳам кўпроқ бўлиши мумкинлиги таъкидланган.
Изоҳ (0)