“Вагнер” хусусий ҳарбий компанияси раҳбари Евгений Пригожин 9 май куни эълон қилган мурожаатида кимни “бахтиёр чол” деганига ойдинлик киритди.

Роликда бизнесмен Россия Мудофаа вазирлиги ўзининг жангчиларида керакли ўқ-дориларни ажратмаётганини айтиб, Россиянинг келажаги “бахтиёр чол”га боғлиқлигини таъкидлаган. Пригожин RTVI журналистининг бу борадаги бир қатор, хусусан, “чол” деганда кимни назарда тутгани борасидаги саволларига жавоб берди.

9 май кунги видеороликда “бахтиёр чол” деганда кимни назарда тутдингиз?

“Саволга жавоб бераман: чол ҳақида бизга снарядлар беришмаётгани ва уларни омборларда сақлашаётгани контекстида гапирдим. Ва ким чол бўлиши мумкин?

Биринчи вариант: генерал Михаил Мизинцев, у бизга снарядлар бермагани учун лавозимдан олинган ва шу сабабли эндиликда у бизга снарядлар бера олмайди.

Иккинчи вариант: снарядлар бериши керак бўлган Бош штаб бошлиғи Валерий Герасимов, аммо биз керакли ҳажмда эмас, балки 10 фоиз миқдордагина снарядларни оляпмиз.

Учинчи вариант: ижтимоий тармоқларда бизга снарядлар солинган қутиларни таклиф қилган Наталья Хим (“Дом-2” телешоусининг собиқ иштирокчиси)”.

Пригожинга кўра, унинг мурожаатидан кейин мамлакат раҳбариятидан Мудофаа вазирлигига хусусий ҳарбий компания сўровларини кўриб чиқиш буйруғи берилган. “Бюрократия сабаб, афсуски, бу узоқ вақтга чўзиляпти”, — дейди у.

Шунингдек, Пригожин ўзига қарши ахборот кампанияси анча йиллардан бери давом этаётганини таъкидлаган. “Фақат буюртмачилар ўзгармоқда, Навалнийдан бошлаб, америкаликлар билан тугаяпти”, — дея қайд этади Пригожин.

Евгений Пригожин снарядлар йўқлиги сабаб жангчиларининг Бахмутдаги позициясини 10 май куни Россия Мудофаа вазирлиги бўлинмаларига топширишини маълум қилганди. Кўп ўтмай у ёлланма жангчилар Бахмутдан кетмаслигини айтди. The Washington Post’нинг ёзишича, Россия Мудофаа вазирлиги “Вагнер” раҳбарини обрўсизлантириш режасини ишлаб чиққан. 

“Вагнер” қандай гуруҳ?

Кўплаб Ғарб ОАВлари “Вагнер” гуруҳи тўғридан тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқатсиз қотилликларда айбланиб келади.

“Konkord” компанияси эгаси бўлган Евгений Пригожин 2016 йилдан буён АҚШ, 2020 йилдан буён эса Евроиттифоқ санкциялари остидадир. Вашингтонда у Интернет тадқиқотлари агентлиги (троллар фабрикаси) ва “Вагнер”ни назорат қилишда айбланган.

У “Вагнер”га алоқадорлигини кўп марта рад этган ва бундай айбловлар сабабли судлашган, аммо 2022 йил сентябрида у “Вагнер” асосчиси эканини маълум қилди. Ташкилотни 2014 йилда, унинг сўзларига кўра, “Донбассда рус халқига нисбатан геноцид” бошланган вақтда тузган.