Бокс бўйича Ўзбекистон мезбонлигида ўтказилаётган Жаҳон чемпионати 9 май кунги дастуридан ўрин олган қатор жанглар якунланди.
-54 кг вазн тоифаси вакили Ойбек Жўраев навбатдаги жангини албаниялик Ариол Зенелига қарши ўтказди. Уч раунд давом этган жангда ўзбекистонлик боксчи 5:0 ҳисобидаги ғалабани қўлга киритди.
Аввалги босқичда Жўраев сербиялик Тамир Галановни мағлубиятга учратганди.
-67 кг вазн тоифасида ҳаракат қилаётган Асадхўжа Мўйдинхўжаев беларуслик Кирил Самадурауга қарши рингга чиқди. Жанг тўлиқ Мўйдинхўжаевнинг устунлигида ўтди ва ҳакамлар бир овоздан Ўзбекистон вакилининг ғалабасини қайд этди.
Асадхўжа бундан олдинги босқичда япониялик Юто Вакитадан устун келганди.
-75 кг вазн тоифасида Ўзбекистон шарафини ҳимоя қилаётган Аълохон Абдуллаев сербиялик Алмир Мемич билан жанг қилди. Дастлабки икки раундда ўзбекистонлик боксчи катта устунлик қайд этди, сўнгги раундни серб боксчиси ўз ҳисобига ёздириб қўйди. Якунда Абдуллаев 4:0 ҳисоби билан ғалабани қўлга киритди.
Абдуллаев аввалги босқичдан хитойлик Менгянг Жаони ютганди.
9 май кунги жангларда Ҳасанбой Дўстматов ва Саиджамшид Жаъфаров ҳам кейинги босқич йўлланмасини нақд қилганди.
Изоҳ (0)