“Конституция моҳиятан инсон шаъни ва қадр-қиммати учун янгилангани сабабли, халқ биздан реал ҳаракат кутмоқда” — Елена Борисова

Қонунчилик палатасининг Фуқаролар соғлиғини сақлаш масалалари қўмитаси раиси Елена Борисова янгиланган Конституция юзасидан фикрларини билдириб ўтди. 

Борисова Конституцион референдум тарихий воқеа эканлигини айтди. 

“Одамлар ўз мамлакати Конституцияси янгиланиши учун овоз берди. Албатта, 90 фоиздан кўпроқ одамлар айнан Конституцияни қўллаб-қувватлагани аҳолининг янги Конституцияда ёзилган ижтимоий-ҳуқуқий ўзгаришларга ишончини билдиради”, — дейди у.

Елена Борисова бугун президент янги Конституция мамлакат ривожланиши учун туртки бўлишини таъкидлаганини айтди.

“Бу давлат ўз зиммасига олган Конституциянинг тегишли нормаларини ҳаётга тадбиқ этишда барча ҳокимият органлари, раҳбарлар, депутат ва сенаторлар зиммасига улкан масъулият борлигини англатади. Конституция моҳиятан инсон шаъни ва қадр-қиммати учун янгилангани сабабли халқ биздан реал ҳаракат кутмоқда. Бу жуда муҳим”, — дея қўшимча қилади Қонунчилик палатасининг Фуқаролар соғлиғини сақлаш масалалари қўмитаси раиси.