Тошкентда Ўзбекистон ва Қатар Ташқи ишлар вазирликлари ўртасидаги сиёсий маслаҳатлашувларнинг навбатдаги босқичи бўлиб ўтди, деб хабар беради ТИВ матбуот хизмати. Унда иштирок этиш учун Қатар ташқи ишлар давлат вазири Султон бин Саад ал-Мурайхий ташриф буюрган.
Қайд этилишича, маслаҳатлашувлар чоғида сиёсат ва дипломатия, савдо-иқтисодий, транспорт, энергетика, фан ва маданият соҳаларида ҳамкорликни фаоллаштириш масалалари муҳокама қилинган. Бундан ташқари, халқаро ва минтақавий сиёсат масалалари, жумладан, Афғонистондаги вазият юзасидан фикр алмашилган.
Шу куни икки давлат ҳукуматлари, дипломатик корпус ва жамоатчилик вакиллари иштирокида Тошкентдаги Қатар элчихонасининг очилиш маросими бўлиб ўтди.
“Шубҳасиз, Қатарнинг Ўзбекистондаги дипломатик ваколатхонаси фаолиятининг йўлга қўйилиши муносабатларимизни сифат жиҳатидан янги босқичга олиб чиқиш, ўзаро манфаатли ҳамкорлик уфқларини кенгайтириш, савдо ва инвестициявий соҳаларни, шунингдек, халқларимиз ўртасидаги алоқаларни жадаллаштиришга хизмат қилади”, — деб ёзади ташқи ишлар вазири Бахтиёр Саидов.
2023 йил март бошларида Ўзбекистонда Мўғулистон элчихонаси очилиши режалаштираётгани тўғрисида хабар берилганди. 1992 йилда икки давлат ўртасида дипломатик муносабатлар ўрнатилганидан бери Мўғулистон ташқи ишлар вазири Ўзбекистонга илк бор ташриф буюрди.
Изоҳ (0)