Будапешт шаҳрида 27 март куни Ўзбекистон элчихонаси очилишига бағишланган маросим бўлиб ўтди, деб хабар беради Ташқи ишлар вазирлиги матбуот хизмати.
Шу муносабат билан ташкил этилган тадбирда Ўзбекистон ТИВ раҳбари Бахтиёр Саидов, Венгрия ташқи ишлар ва савдо вазири Петер Сийярто, иқтисодий ривожланиш вазири Мартон Над, шунингдек, кенг жамоатчилик, сиёсий, ишбилармон доиралар вакиллари, маҳаллий ОАВ ходимлари иштирок этган.
Саидов ўз нутқида Ўзбекистон очиқ, прагматик, тинчликсевар ташқи сиёсат юритаётгани, барча давлатлар билан ўзаро манфаатли алоқалар ривожланиб бораётгани, хусусан, Венгрия билан ҳамкорликни кенгайтириш мамлакат ташқи сиёсатининг муҳим йўналишларидан бири эканини таъкидлаган.
Ўз навбатида, Петер Сийярто Ўзбекистон элчихонасининг очилиши икки тинчликсевар мамлакатлар ўртасидаги алоқаларда кузатилаётган ижобий ўсиш суръатининг ёрқин тасдиғи эканини, элчихона фаолияти ўзаро ҳурматга асосланган икки томонлама муносабатларни ҳар жиҳатдан бойитишга хизмат қилишини қайд этган.
“Ўзбекистон—Венгрия муносабатлари халқаро ва минтақавий ташкилотлар, шунингдек, кўп томонлама тузилмалар доирасидаги фаол ҳамкорлик натижасида янада кенгаймоқда. Шу ўринда БМТ ва ЙХҲТ билан бир қаторда Туркий давлатлар ташкилотини ҳам алоҳида таъкидлаб ўтиш ўринли”, — дейилади хабарда.
Элчихона биноси Будапешт шаҳрининг марказий ҳудудида жойлашган бўлиб, у кўҳна ва замонавий архитектура талабларини мужассам этган.
Изоҳ (0)