2023-yilda O‘zbekistonda Mo‘g‘uliston elchixonasi ochilishi rejalashtirilmoqda. Bu haqda 8-mart kuni Toshkent shahrida O‘zbekiston tashqi ishlar vaziri Baxtiyor Saidov va Mo‘g‘uliston tashqi ishlar vaziri Batmunx Batsetseg ishtirokida o‘tkazilgan uchrashuvda maʼlum qilindi. Hozirda mamlakatda Mo‘g‘ulistonning faxriy konsulligi mavjud.
“O‘zbekistonda Mo‘g‘uliston elchixonasini ochish qarorini olqishlaymiz. So‘nggi yillarda ikki tomonlama aloqalar barcha sohalarda istisnosiz ijobiy surʼat ko‘rsatmoqda”, — deb yozadi Baxtiyor Saidov o‘zining Telegram kanalida.
Tashqi ishlar vazirligining xabar berishicha, uchrashuvda o‘zaro hamkorlikning shartnomaviy-huquqiy asoslarini kengaytirish, TIVlararo maslahatlashuvlarning navbatdagi davrasini o‘tkazish, savdo aylanmasini diversifikatsiya qilish va qo‘shma hamkorlik loyihalarini amalga oshirish bo‘yicha takliflar muhokama qilingan.
Qishloq xo‘jaligi sohasida hamkorlik bo‘yicha O‘zbekiston—Mo‘g‘uliston ishchi guruhi va Ishbilarmonlar kengashini tashkil etish masalalarini o‘rganish bo‘yicha kelishuvga erishilgan.
7-martdan 10-martga qadar davom etadigan tashrif doirasida Batmunx Batsetseg va Mo‘g‘ulistonning boshqa rasmiy vakillari O‘zbekiston qishloq xo‘jaligi, sarmoya, sanoat va savdo, transport vazirliklari hamda Vazirlar Mahkamasida ham uchrashuvlar o‘tkazmoqda.
Ta’kidlanishicha, bu 1992-yilda ikki davlat o‘rtasida diplomatik munosabatlar o‘rnatilganidan beri Mo‘g‘uliston tashqi ishlar vazirining O‘zbekistonga ilk tashrifidir. Mo‘g‘uliston prezidenti esa Shanxay hamkorlik tashkiloti sammitida ishtirok etish uchun kuzda O‘zbekistonga tashrif buyurgandi.
Izoh (0)