Украинадаги можарони ҳал этиш муҳокамасига Хитойнинг қўшилиши 2023 йил охирига бориб Москва ва Киев ўртасида ҳақиқий музокаралар бошланишини таъминлаши мумкин. Бу ҳақда АҚШнинг собиқ давлат котиби Генри Киссенжер CBS телеканалига берган интервьюсида маълум қилди.
“Эндиликда Хитой аралашишни бошлагач… Ўйлайманки, йил охирига бориб биз музокаралар жараёни, ҳатто ҳақиқий музокаралар ҳақида гапиришимиз мумкин бўлади”, — дейди у.
Киссенжердан агарда АҚШ президенти илтимос қилса, Владимир Путин билан музокаралар ўтказиш учун Москвага бориш-бормаслиги ҳақида сўрашган. Собиқ давлат котиби диалогнинг ҳақиқий иштирокчиси эмас, балки маслаҳатчи сифатида бориши мумкинлигини айтган.
Генри Киссенжер 2022 йилда Украина можаросини музокаралар йўли билан ҳал этишни ёқлаб чиққанди. Шу билан бирга, у НАТО Россия ва Москвага ён босмаслиги кераклигини таъкидлаган.
“Россиянинг энг янги тарихида биринчи марта Америка билан Европани ўз ядро кучлари билан ҳимоя қилишда асосий бўғин сифатида эмас, балки Европа билан бир бутун бўлиб ёнма-ён яшаш заруриятига тўқнаш келади”, — деганди Киссенжер.
Киссенжер 1969—1975 йилларда АҚШ президентининг миллий хавфсизлик бўйича маслаҳатчиси бўлган. 1973—1977 йилларда давлат котиби лавозимини эгаллаган. 2023 йил 27 май куни у 100 ёшга тўлди.
Изоҳ (0)