Украина томонидан режалаштирилаётган қарши ҳужум 2023 йил охиригача Киев ва Москва ўртасидаги музокараларга йўл очиши мумкин. Бу ҳақда АҚШ ва Европа Иттифоқи расмийларига таяниб, The Wall Street Journal (WSJ) хабар берди.
Хитой Россияни музокара столига ўтқизиши мумкин. Бундай вариант Пекиннинг Москвага яқинлиги сабабли тинчлик ташаббусига қўшилиш ғоясини танқид қилган ғарбликларнинг, айниқса Қўшма Штатларнинг фикрлашини ўзгартиради.
АҚШ Давлат котиби Энтони Блинкен очиқчасига Пекин можарони юмшатишга ёрдам бериши мумкинлигидан хавотир билдирган.
“Ушбу ёндашув урушнинг ҳар икки томони чексиз кураш олиб бориши мумкин эмас деган нуқтаи назарга асосланади. Пекиннинг халқаро тинчлик музокараларида рол ўйнашга тайёрлиги синовдан ўтказилиши керак”, — дейилади хабарда.
WSJ интервью берган кўпчилик расмийлар Россиянинг президент Владимир Путин даврида ўт очишни тўхтатиш бўйича музокаралар олиб боришга тайёрлигига ишончи комил эмас.
АҚШнинг музокараларга бўлган қизиқиши уларни тўлиқ миқёсдаги урушни тугатишни ёки ҳеч бўлмаганда унинг интенсивлигини камайтиришни хоҳлайдиган баъзи Европа мамлакатларига яқинлаштирмоқда.
Европа расмийлари ва АҚШ миллий хавфсизлик кенгашидаги юқори даражадаги вакиллар тинчлик музокаралари ғоясини қўллаб-қувватламоқда. АҚШ Давлат департаменти ва Марказий разведка бошқармаси Украина қуролли кучларининг ҳужуми дипломатик ташаббуслардан олдин қандай кечаётганини кўришни истайди.
Украина ва Россия ўртасидаги музокаралар: нега Ғарб бунга интилмоқда?
Музокараларни бошлаш ташаббуси ғарб иттифоқчилари уруш боши берк кўчага тушиб қолса, Украинани қўллаб-қувватлай олмайди, деган хавотирлар фонида амалга оширилмоқда. Асосий муаммо — ўқ-дорилар билан таъминлаш, чунки Ғарб саноатчилари Украина қуролли кучларига ёрдам бериш орқали ўз эҳтиёжларини қондира олмаслиги мумкин.
“Ғарб етакчилари секин-аста йирик урушни тугатиш энг яхши вариант бўлади деган консенсусга интилмоқда”, — деди Брукингс институтининг собиқ Миллий хавфсизлик кенгаши ходими Фиона Хилл.
Польша, Болтиқбўйи давлатлари ва баъзи Британия расмийлари, агар бўлажак ҳужум жанг майдонидаги вазиятни ўзгартирмаса ҳам, Украинага тараққиётга эришиш учун вақт бериш керак, деб ҳисоблайди.
“Ҳар қандай музокаралар қандай бўлишини аниқлашнинг иложи йўқ, аммо Париж ва Берлинда кенг қамровли ўт очишни тўхтатиш тўғрисидаги келишувга қизиқиш билдирилган, бу Хитойни тинчликка эришиш бўйича кафиллар қаторига олиб кириши мумкин”, — дейилади хабарда.
Париж ва Берлиндаги юқори мартабали амалдорлар Оқ уйдан Украина армияси кутилган муваффақиятдан кейин музокараларни осонлаштиришга ҳаракат қилишини кутмоқда. Мақсад Украинанинг жанубдаги муҳим ҳудудларни қайтариб олиши, бу ҳатто Россия бошқа босиб олинган ҳудудларни сақлаб қолган тақдирда ҳам муваффақиятга эришишни англатади, дейилади хабарда.
Изоҳ (0)