Bosfor bo‘g‘ozi ostidan o‘tuvchi uchinchi tunnel quriladi va u Turkiyaning eng yirik metropol shahrining Yevropa va Osiyo qismlarini bog‘laydi. Bu haqda “Yevropeyskaya pravda” xabar berdi.
Turkiya prezidenti Rajab Toyyib Erdo‘g‘on Istanbuldagi saylovoldi mitingida bu bo‘yicha ma’lumot berdi. U ushbu loyihaning amalga oshirilishi tufayli Istanbul transport tizimiga har kuni 6,5 million fuqaro foydalanadigan 11 xil temiryo‘l liniyalari ulanishini ta’kidladi.
“Biz hozir Katta Istanbul tunneli loyihasini amalga oshirmoqdamiz. Bu loyiha Marmaray va Yevrosiyo tunnellaridan keyin Bosfor bo‘g‘ozi ostidan o‘tadigan uchinchi tunnel bo‘ladi”, — dedi Erdo‘g‘on.
Katta Istanbul tunneli uch qavatli bo‘lishi rejalashtirilgan bo‘lib, bu uni dunyodagi birinchi shunday loyiha ekani bilan ajratib turadi.
Turkiya va Bosfor ostidagi tunnellar
2013-yil oktabr oyida Turkiya Bosfor bo‘g‘ozi ostidan temiryo‘l tunnelini ochayotgani haqida xabar berilgandi. Ochilish marosimi Turkiya respublikasi tashkil topganining 90 yilligiga bag‘ishlangan.
Marmaray loyihasi 2004-yilda boshlangan va dastlab Turkiya tomonidan strategik loyiha sifatida qaralgan. U turk-yapon konsorsiumi tomonidan qurilgan. Yaponiya tomoni loyihaning o‘ziga xos xususiyatlari va marshrutni yotqizish shartlarini hisobga olgan holda tunnel qismlarini ishlab chiqqan. Magistral yo‘lning umumiy qiymati, jumladan, kirish yo‘llari, mavjud yo‘llar va unga infratuzilma obyektlarini bog‘lovchi yo‘llar bilan birga, taxminan 5 milliard dollarni tashkil etgan.
Tunnel uzunligi 13,6 kilometr bo‘lib, u yer ostidan 56 metr chuqurlikda o‘tadi.
2016-yilning dekabr oyida Istanbulda Bosfor bo‘g‘ozi ostidan o‘tuvchi avtomobil tunneli ochilgandi. Ikki qavatli “Yevrosiyo” tunnelining uzunligi 14,6 kilometrni tashkil qiladi. Bosfor ostida yotqizilgan tunnel qismining uzunligi 5,4 kilometrni, maksimal chuqurligi esa bo‘g‘oz yuzasi ostida 106 metrdan iborat.
Izoh (0)