Шавкат Мирзиёев Олий Мажлис палаталари, сиёсий партиялар, суд ва ижро этувчи ҳокимият органлари раҳбарлари ҳамда жамоатчилик фаоллари билан референдум якунларига бағишланган учрашувда Ўзбекистон дунёвий давлат эканини таъкидлаб ўтди.
“Ўзбекистон — дунёвий давлат ва бундан кейин ҳам шундай бўлиб қолади. Халқимизнинг референдум орқали билдирган хоҳиш-иродаси, қатъий танлови ҳам шу!” — деди президент.
Давлат раҳбари бундан буён ҳам миллати, тили, дини ва ижтимоий келиб чиқишидан қатъи назар ҳар бир фуқаронинг виждон эркинлиги таъминланиши; барча диний конфессиялар эркин фаолият юритиши учун зарур шарт-шароитлар яратиб берилиши; Ўзбекистонда миллатлар ва конфессиялар ўртасида тотувлик ва ҳамжиҳатликни таъминлаш сиёсати изчил давом эттирилиши таъкидлади.
Шунингдек, жамиятда ҳар қандай радикаллашувга, диндан сиёсий мақсадларда фойдаланишга ҳеч қачон йўл қўйилмаслигини қайд этди.
“Мен президент сифатида иш бошлаган биринчи кунданоқ ъБиз халқимизга хизмат қилгани келганмизъ, ъБиз халқни рози қилишимиз керакъ деган гапларни доим такрорлайман. Ислоҳотларни бошлаган пайтда ўзимиз тасаввур ҳам қилмаган жуда кўп муаммо ва синовларга дуч келдик. Уларга эл-юртимиз билан биргаликда ечим топиб, ҳар бир масалани жойида ҳал қилиб бораяпмиз”, — деди Шавкат Мирзиёев.
Давлат раҳбари янгиланган Конституциянинг маъно-мазмуни, бош мақсади ҳам халқнинг фаровон ҳаёт кечириши учун муносиб шарт-шароит яратиб беришдан иборатлигини таъкидлаб, бу мақсад йўлида қанчалик оғир бўлмасин, зарур маблағларни, керак бўлса, ортиқчаси билан топиб, барча имкониятларни ишга солинаётганини билдирди.
“Халқимизнинг ўзи — энг адолатли ҳакам. Мен аминман, бугун юртимиздаги ҳар бир инсон ъҳаётимда ижобий ўзгариш бўлмоқдаъ, деб айта олади”, — деди президент.
Изоҳ (0)