Сирдарё вилоятида 6—8 май кунлари “Замонавий бахшичилик санъати: олтин мероснинг янги оҳанглари” мавзусидаги III халқаро илмий-амалий конференция бўлиб ўтди. Бу ҳақда “Дарё” мухбири хабар бермоқда.
Анжуманда Қозоғистон, Қирғизистон, Озарбайжон, Россия, Туркия, Венгрия, Корея Республикаси, Япония каби 30 дан ортиқ мамлакатдан соҳанинг етук мутахассислари иштирок этди. Шунингдек, Ўзбекистоннинг турли олий ўқув юртларида, илмий-тадқиқот институтларида фаолият юритаётган фолклоршунос олимлар, бахшичилик ва халқ оғзаки ижоди масалаларига қизиқувчи тадқиқотчилар ҳам соҳага алоқадор илмий-назарий мақолалари билан қатнашди.
III халқаро бахшичилик санъати фестивали доирасида ўтказилган кўрик-танловда бош соврин – Гран-прини Илҳом Норов (Ўзбекистон) қўлга киритди. Ғолибга 7 минг доллар пул мукофоти берилди.
1-ўрин Сариев Гарягди (Туркманистон), Саламат Аяпов (Ўзбекистон), Сандан Арес (Россия), Рисбай Исаков (Қирғизистон)га берилди. Ҳар бир ғолибга 2500 доллар пул мукофоти берилди.
2-ўринга Расулбек Абдураҳмонов (Ўзбекистон), Нугзар Кавтарадзе (Грузия), Сарвар Сабри Камал (Ҳиндистон), Ярослав Дмитров Христов (Болгария) сазовор бўлди. Ҳар бир ғолибга 1750 доллар пул мукофоти берилди.
3-ўринга Дилмурод Гулмуродов (Ўзбекистон), Серик Жақсиқулов (Қозоғистон), Эрдане Ват Есун (Монголия), Шин Жа Сун (Жанубий Корея) муносиб топилди. Ҳар бир ғолибга 1250 доллар пул мукофоти берилди.
Шунингдек, турли номинация ва йўналишлар бўйича ҳам ғолиб ва совриндорлар тақдирланди.
Анжуман якунида бахшичилик санъати истиқболи билан боғлиқ резолюция қабул қилинди.
Изоҳ (0)