Gentra 17 минг, Malibu 38 минг доллар: Сергели машина бозоридаги нархлар билан танишамиз

Тошкентдаги Сергели машина бозорида автомобилларнинг ўртача нархи қанча? Gentra қанчадан сотилади-ю, Nexia-3 нинг баҳоси неча пул? “Дарё” шу каби саволларга жавоб излаб Сергели машина бозоридан репортаж тайёрлади.

Унга кўра, 7 апрель ҳолатига 2023 йилда ишлаб чиқарилган, ҳали давлат рақами тақилмаган, “техпаспорт” олинмаган Damas машинаси 10 минг 800 долларга баҳоланади. 2022 йилда ишлаб чиқарилган худди шундай машина эса 10400—10300 доллар атрофида сотилади.

Ишлаб чиқариглан йили, қанча масофа босиб ўтгани, метан газ ўрнатилгани ёки ўрнатилмагани, баллони алмаштирилгани ёки алмаштирилмагани, салонларига “чехол” қўйилгани, бошқа харажатлар қилинганига қараб, автомашинанинг нархи кўтарилиши ёки тушиши мумкин.

Matiz автомобилининг ишлаб чиқарилиши тўхтатилгани боис бу автомашина турли кўрсаткичларига қараб 2500 доллардан 5000—7000 долларгача сотилмоқда.

Механик узатгичли қутига эга, ҳали ҳеч қанча масофа босиб ўтмаган Nexia-3 автомашинаси 13 минг долларга сотилмоқда. Бу турдаги машиналар бозорда энг талабгир ҳисобланади.

Cobalt машинасининг оддий дискали, ABS-best тормозга эга модели 14500—14400 доллар нархда баҳоланмоқда. Сака дискали, сидена материалларида фарқи бор Cobalt эса 14 минг 800 долларга сотилган.

Gentra автомашинасининг оқ рангли, идеал ҳолатдаги, энг янги модели 17 минг 700 долларга баҳоланмоқда. Қора ранглиси эса бир оз қимматроқ. Gentra’нинг бозордаги ўртача нархи 17—18 минг доллар атрофида.

Onix автомашинасининг пример позицияси учун 22 минг доллар сўралмоқда. LTZ позицияси эса 19 минг доллар. Бундан бошқа позициялари ҳам салон нархидан бир неча минг доллар қимматроққа сотиляпти.

Янги Tracker-2 машинаси 26 минг долларга сотилмоқда. Машинанинг рангига қараб нархлар ўзгаради ва бозорда ўртача 25000—27000 доллар атрофида баҳоланмоқда.

Malibu-2 автомашинасининг пример позицияси — АҚШда ишлаб чиқарилгани 37 мингдан 40 минг долларгача, Хитойда ишлаб чиқарилгани 36 мингдан 38 минг долларгача сотиляпти. Савдогарларнинг айтишича, бу машина сотувидан катта фойда қолмайди. Асосий талаб Onix, Gentra, Nexia-3 каби машиналарга бўлмоқда.