Amnesty International ташкилоти “апартеидни автоматлаштириш” номли ҳисоботида мамлакатларни Исроилни кузатув технологияси билан таъминлашга йўл қўймаслик учун ўз компанияларини тартибга солишга чақирди.
“Исроил ҳукумати босиб олинган ҳудудларда апартеид режимини ўрнатиш учун юзни таниш технологиясидан фойдаланмоқда”, — дейилади ҳисоботда.
Ташкилот, шунингдек, Исроилга қурол ва мудофаа технологиялари сотишни тўхтатишга чақиради. Ғарбий Соҳилда ва хусусан Хевронда юзни таниш технологиясидан фойдаланиш ҳақида маълумотлар аввал ҳам эълон қилинган, бироқ жорий ҳисоботда шаҳардаги назорат пунктларида ўрнатилган илғор тизим ҳақида қўшимча маълумотлар келтирилган.
Фаластинликлар Red Wolf (Қизил бўри) назорат пунктидан ўтаётганда, уларнинг юзи ўзи билмаган ҳолда сканердан ўтказилади ва фаластинликлар ҳақидаги мавжуд маълумотлар базаларида топилган маълумотлар билан таққосланади. Номаълум юзлар тизимда автоматик равишда сақланади.
Ташкилот маълумотларига кўра, шахс тизимда кўринмаса, шунингдек, у ноқонуний фаолиятда гумон қилингани аниқланса, назорат-ўтказиш пунктидан ўтказилмайди.
Amnesty’га кўра, Red Wolf бошқа иккита кузатув тизими — Wolf Pack ва Blue Wоlf билан боғлиқлиги ҳақида “кучли далиллар” мавжуд бўлиб, уларнинг тафсилотлари аввалроқ эълон қилинган. Wolf Pack — бу ҳудудлардаги фаластинликларнинг маълумотлар базаси, Blue Wоlf — бу Исроил кучлари томонидан маълумотларни олиш учун ишлатиладиган мобил телефон иловаси.
Ташкилот ҳисоботнинг яна бир қисми Шарқий Қуддусда кузатув камераларидан фойдаланишга қаратилган. Ташкилот маълумотларига кўра, Шайх Жарраҳ ва Сильванда ўрнатилган видеокузатув камералари сони 2021 йилнинг май ойида сезиларли даражада ошган. Amnesty International Хитойнинг Hikivision ва Нидерландиянинг TKH Security Solutions компаниясининг видеокузатув камералари Шарқий Қуддусда топилганини даъво қилмоқда. TKH Security бунга жавобан ҳозирда Исроил хавфсизлик кучлари билан тўғридан-тўғри бизнес алоқалари йўқлигини айтди.
“Исроил ҳукумати фаластинликларга қарши сегрегацияни (кундалик ҳаётда одамларни ирқий, этник ёки бошқа гуруҳларга мажбуран ажратиш) кучайтириш ва апартеидни (ирқий сегрегациянинг расмий сиёсати) автоматлаштириш учун мураккаб кузатув воситаларидан фойдаланмоқда. Хевроннинг Ҳ2 ҳудудида биз янги Red Wolf юзни аниқлаш тизими ҳаракатларни кузатиш ва назорат қилиш учун фаластинликлар ҳақида ноқонуний биометрик маълумотлар тўплашини аниқладик”, — дейди Amnesty International бош котиби Анис Каламар.
Исроил мудофаа кучлари бунга жавобан Яҳудия ва Самарияда тартиб ва хавфсизликни таъминлашга ҳаракат қилаётганини айтди
“Терроризмга қарши кураш доирасида армия зарур хавфсизлик ва разведка операцияларини олиб боради ва бу террорчилар томонидан, жумладан, Фаластин аҳолисига етказилган зарарни камайтириш мақсадида амалга оширилади”, — дейди Исроил кучлари.
Изоҳ (0)