Россия президенти Владимир Путин 2021 йил февраль ойи охири ва март ойи бошида кенг кўламли урушга тайёргарлик кўришга қарор қилган. “Вёрстка” нашри тегишли суриштирув материалини эълон қилди.
Тўлиқ миқёсдаги урушга тайёргарлик юқори даражадаги махфийликда ўтган. Бироқ 2021 йилнинг ёзидан бошлаб мумкин бўлган уруш ҳақидаги гаплар Кремлга яқин одамлар орасида айланган.
2022 йил 12 июлда Кремль сайтида Путиннинг “руслар ва украинларнинг тарихий бирлиги тўғрисида”ги мақоласи пайдо бўлган. ОАВ маълумотларига кўра, унинг матни кўп марта ўзгарган ва вариантлардан бирида уруш бошлаш эҳтимоли ҳақида тўғридан-тўғри таҳдид мавжуд эди. Якуний версиядан мазкур таҳдид олиб ташланган.
Нашр манбаларига кўра, урушдан уч ой олдин руслар Украинани йирик корпорациялар ўртасида қандай қилиб бўлишни муҳокама қилган. Бунга асосан ҳар бир ҳудуднинг ривожланиши учун Кремлга яқин давлат ёки хусусий корпорациялардан бири масъул бўлиши керак эди.
Путинга яқин бўлган учта манба Россия президентининг босқинчиликка киришишидаги “сўнгги томчи” унинг чўқинтирган отаси Виктор Медведчукнинг каналларига қарши санкциялар бўлганини тасдиқлади.
“Медведчукдан телевидение ва партия тортиб олинганидан кейин уруш бошланди. Бу ҳақиқатан ҳам Путинни ҳайратда қолдирди. У буни шахсий ҳужум сифатида қабул қилди”, — деб тушунтирди Россия президентининг узоқ йиллик танишларидан бири.
Шу билан бирга, Путиннинг ўзи Медведчук билан босқин ҳақида маслаҳатлашмаган. Путин билан доимий алоқада бўлган ягона шахс унинг дўсти Юрий Ковалчук эди. Икки манба айнан у Россия президентининг қарорида ҳал қилувчи рол ўйнаганини тасдиқлайди. Пандемия пайтида фақат Ковалчук карантин ўтамаслик учун Путиннинг қароргоҳини тарк этмаган.
Шу билан бирга, мудофаа вазири Сергей Шойгу Путиннинг қарори юзасидан “баҳслашмаган, балки ундан қувонган”.
“У армиянинг аҳволини тушунмаганди ва қизиқди. Шойгу Россия раҳбари билмаган нарсани билишига ишонди ва ҳақиқатан ҳам Қримни аннексия қилишдан жиддийроқ нарса бўлмайди, деб ўйларди”, — дейди Путиннинг эски дўстларидан бири.
“Бу деярли бутун элита қарши бўлган уруш. Мен Россиядаги хўжайинлар билан гаплашаман, ҳокимиятнинг энг юқори эшелонларидан ҳужумни ёқлайдиган биронта ҳам одам йўқ. Аммо улар бир жамоа бўлиб ишлаши кераклигини тушунади”, — дейди Кремлнинг собиқ амалдори Россия расмийлари билан шахсий суҳбатларига таяниб.
Изоҳ (0)