Камилла Паркер-Боулз олижаноб зодагонлар оиласида вояга етган. Унинг отаси Британия армиясида майор бўлган, герсогинянинг қариндошлари орасида ҳурматли лордлар ҳам, рассомлар ҳам бор. Шунга қарамай Камилланинг келиб чиқиши қиролича Елизавета II га мутлақо ёқмаган, шунинг учун шаҳзода Чарльзга у билан турмуш қуришга рухсат берилмаган.
70 йилларнинг бошларида Камилла ва Чарльз аллақачон яқин муносабатлар билан боғланган эди. Чарльз Камиллани ақлдан озар даражада севган, аммо онасига қарши туролмаган. Рад этилган келин қайғуга ботмади: 1973 йилда бўлажак герсогиня Эндрю Паркер-Боулзга турмушга чиқди. Бу орада Камилла шаҳзодага қасдма-қасдига бу никоҳга рози бўлгани ҳақида миш-мишлар тарқалди.
Шу билан севги ҳикояси тугаганга ўхшарди: Камилла икки фарзандли бўлади, Чарльз малика Дианага уйланади. Бироқ бундай кучли ҳис-туйғулар камдан кам ҳолларда унутилади. 80 йилларда Чарльз ва Камилла яширинча учрашишни бошлади. Инсайдерларнинг сўзларига кўра, бўлажак қирол доимий равишда Камиллага қўнғироқ қилиб, усиз яшай олмаслигини айтган.
Путур етган обрў
Эртами-кечми Диана бу ҳақда билиб қолиши аниқ эди. Малика Диана эрининг кўп йиллик хиёнатига амин бўлгач, чуқур депрессияга тушиб қолади. Диананинг бу борадаги интервьюси эса ҳеч кимни бефарқ қолдирмади, интервьюда оиласининг бузилишига сабабчи бўлган Чарльз ва унинг ўртасидаги учинчи шахс ҳақида гапиради. Бу гаплар Камилланинг обрўсига биринчи зарба бўлди.
1997 йилда Диана кутилмаганда вафот этганида Паркер-Боулзга маломат тошлар ёғилди. Қалблар маликасининг фожиали тақдири бутун дунё бўйлаб миллионлаб одамларни ҳайратда қолдирди. Содир бўлган воқеада юраклари эзилган мухлислар қироличани, Чарльз ёки Диананинг ўзини эмас, балки Камилла Паркер-Боулзни айблайдилар.
Папарацилар уни ҳамма жойда кузатишар, журналистлар кечаси билан Камилланинг уйи ёнида пойлашарди. Бу вақтга келиб, аёл эридан ажрашганди, аммо аниқ сабабларга кўра у Чарльз билан учраша олмасди. Натижада у ёлғиз ўзи бу таҳқирларга дош беришга мажбур бўлади.
Қирол оиласининг мухлислари Қироллик оиласи Камилладан нафратланишларига амин эдилар. Аммо малика Диананинг болалари бир неча бор ўгай онасини ҳимоя қилиб, уни меҳрибон ва ажойиб инсон деб аташди.
“Тўғрисини айтсам, Уилям ва мен у билан доим жуда яхши, яқин муносабатда бўлганмиз. У ёмон ўгай она эмас. Менга ҳам, Уилямга ҳам ачинишингиз шарт эмас, яхшиси, унга меҳр кўрсатинг. У ажойиб аёл ва отамни кўнглини топа олади — биз учун энг муҳими шу. Уилям ва мен уни тасаввур қилганингиздан ҳам кўпроқ яхши кўрамиз”, — дейди шаҳзода Гарри интервьюсида.
Оилага қабул қилиш
Айтганча, Уилям ҳам, Гарри ҳам 2005 йилда Чарльз ва Камилланинг тўйида иштирок этган. Аммо қиролича тадбирда қатнашмайди. Айтганча, Елизавета II ва Паркер Боулз ўртасидаги кескин муносабатлар ҳақидаги миш-мишлар қироличанинг вафотигача тинмади. Тахминларга кўра, малика ўғлининг танловини қабул қилмаган. Бироқ давлат раҳбари тахтга ўтирганининг 70 йиллигига бағишланган тантанали маросимда айтган сўзлари бунинг аксини айтди.
“Вақти етиб ўғлим Чарльз қирол бўлганда, умид қиламанки, сиз унга ва унинг рафиқаси Камиллага ҳам менга берган ёрдамингизни аямайсиз. Самимий тилагим шундаки, ўша пайт келганда Камилла консорт қиролича сифатида ўзининг содиқ хизматини давом эттиради”, — деган қиролича
Уларнинг ноқонуний ўғли бўлганми?
Айтганча, меросхўрлар ҳақида: 2019 йилда бир киши шаҳзода Чарльз ва Камилла Паркер-Боулзнинг ноқонуний ўғли эканлигини даъво қилган эди. Унинг айтишича, 1967 йилда Чарльз ва Камилла жанжалнинг олдини олиш учун уни, яъни Саймон Доранте-Дайни ҳомийлик остидаги оилага беришган.
“Бувим саройда ишлаган. Мен унга жуда яқин эдим, у менга Камилла ва Чарльзнинг фарзанди эканлигимни кўп марта айтарди. У шунчаки ишора қилмасди, тўғридан тўғри айтарди”, — деди Саймон журналистларга 18 ойлигида Карен ва Девид Дай томонидан асраб олинганлигини таъкидлаб.
Саройда ноқонуний меросхўрнинг пайдо бўлишига шубҳа билан қаралди ва генетик текширувдан ўтказиш рад этилди. Ўжар Саймон қироллик жуфтлиги шунчаки ўз обрўсига путур етказмоқчи эмас, шунинг учун бунга эътибор беришмади, деган гап тарқатди.
Янги мавқе
Камилла мунтазам равишда ижтимоий тадбирларда қатнашади ва бир нечта хайрия жамғармаларининг ишларини бошқаради. Вақт ўтиши билан жамиятда герсогиняга бўлган муносабат яхшиланди: энди ҳатто Диананинг мухлислари ҳам Камилла севгиси учун ноҳақ айбланганини тушунишди.
Гарчи қиролнинг турмуш ўртоғи унвони Камиллага янги расмий вазифалар юкламаса ҳам, у норасмий бурчини бажариши керак: ҳукмронлиги даврида эрини қўллаб-қувватлаш. Шундай қилиб, фаол ижтимоий фаолияти билан танилган шаҳзода Филипп ва шаҳзода Алберт бу юкни аъло даражада уддалашди.
6 май куни Чарльз III нинг рафиқасига ҳам янги монархнинг тахтга ўтиргани муносабати билан тож кийдирилди. Эҳтимол, шу билан Камилла ва Диананинг душманлик муносабати ҳақидаги гаплар ортда қолар.
Изоҳ (0)