Тошкентнинг Олмазор туманида бир нечта фуқаролар билан савдо қилиш учун жой талашган аёл ўзига бензин сепиб, ёқиб юборганди. Бош прокуратура матбуот котиби Ҳаёт Шамсутдинов ҳолат юзасидан жиноят иши қўзғатилганини маълум қилди.
Пойтахт ИИББ берган маълумотга кўра, воқеа 2 май куни соат 10:00 ларда Олмазор тумани Қора қамиш 2/4 даҳасидаги савдо дўконларидан бирининг олдида юз берган. 1981 йилда туғилган аёл Д.Қ. бир нечта фуқаролар билан савдо қилиш учун жой талашган. Сўнгра ўзаро келиша олмай жанжаллашиб, ўзини ноодатий тутган ҳолда норозилик билдириб, ёнида бўлган елим идишдаги бензинни устига қуйиб, ўзини-ўзи ёқиб юборган. Ҳолат акс этган видео ижтимоий тармоқларда тарқалган.
Оқибатда аёл юзи, иккала қўли, танасининг олд қисми 35 фоиз термик куйиши ташхиси билан шифохонага ётқизилган.
Шунингдек, ўтказилган бирламчи суриштирув давомида Д.Қ. бундан олдин ҳам фуқаролар билан савдо қилиш учун жой талашиб жанжаллашгани ҳамда бир неча маротаба ўзини ёқиш ҳолатларини содир этишга ҳаракат қилгани, бироқ ходимлар томонидан бунинг олди олингани аниқланган.
Мазкур ҳолат юзасидан Жиноят кодексининг 103-моддаси (ўзини ўзи ўлдириш даражасига етказиш) билан жиноят иши қўзғатилган. Аёл тан жароҳати олгани бўйича судга оид тиббий экспертизаси тайинланган. Тергов ҳаракатлари олиб борилмоқда.
Апрель охирларида Тошкент шаҳридаги хонадонларнинг бирида эркак спиртли ичимлик таъсирида ўзини ёқиб юборгани тўғрисида хабар берилганди. Март бошларида Андижон вилоятининг Жалақудуқ туманида яшовчи 23 ёшли келин адирлик ҳудудида ўзига бензин қуйиб, ёқиб юборганди.
Изоҳ (0)