Бухоро вилояти Шофиркон туманида эркак 22 йилдан буён бирга яшаб келаётган рафиқасини уриб, қовурғалари ва бурнини синдирди. Вилоят ИИБ ҳолат юзасидан маълумот берди.
Аёл даволанаётган шифохона бўлим бошлиғининг билдиришича, аёл 30 апрель куни олиб келинган. Келган вақтида ташхиси: бош мия ёпиқ шикастланиши, бош мия чайқалиши, чап қовурға 7-8-қовурғаларининг синиши, бурун суякларининг ёпиқ синиши деб белгиланган. Ҳозирда аҳволи оғир.
Жабрланувчи аёл ҳодиса содир бўлган кундаги воқеани айтиб берди. Унинг таъкидлашича, бу илк бор зўравонликка учраши эмас.
“Маст ҳолатда келди. Телефонда биттаси билан гаплашиб ўтирган эди. Ўғлим билан супада ўтиргандик. Боламга дарвозани ёпиб келишини айтганимда нега гапимга гап қўшдинг, деб мени уриб, дўппослаб кетди. Ўғилчамнинг қўлидан ҳеч нима келмайди, кичкина ҳали. Дарвозани қулфлаб қўйган эдилар, қоча олмадим. Орқа эшикчани очиб, онамникига қочиб кетдим. Бу ҳодиса неча марта бўлган. Лекин бу даражада урмаган эди. Яхши бўлиб кетармиз, деб ўйлар эдим”, — дейди аёл.
Мазкур ҳолат туман ИИБ навбатчилик қисмида тегишли тартибда қайддан ўтказилиб, терговга қадар текширув ҳаракатлари олиб борилган. Жиноят кодексининг 126-моддаси 4-қисми билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)