Қримни озод қилиш яриморол ҳудудида тўғридан тўғри жангларсиз амалга оширилиши мумкин. Бу ҳақда Украина мудофаа вазири Алексей Резниковга таяниб, The Atlantic хабар берди.
Қрим Украина учун стратегик аҳамиятга эга. Резников Киев қарши ҳужумни амалга оширишнинг соф ҳарбий имкониятларини кўриб чиқмаётгани, гап яриморолни озод қилишнинг ҳарбий-сиёсий йўли ҳақида катаётганини айтди.
Украина мудофаа вазири Россия Қримни ўзига хос қалъага айлантираётгани ҳақида гапирди.
“Россия яриморолдаги автомобиль, сув ва темир йўлларини тўсиб қўйганидан кейин яриморолда қўним топган кўплаб руслар бошқа жойда яшаш яхшироқ эканини тушунди”, — дейди у.
Резниковнинг таъкидлашича, ноқонуний қурилган Қрим кўпригидаги портлашлардан кейин россияликларнинг бир қисми аллақачон яриморолни тарк этган.
“Биз Қримни жангсиз оламиз”, — таъкидлади Украина мудофаа вазири.
У яриморолни деоккупация қилиш бўйича аллақачон батафсил режалар ишлаб чиқилганига тўхталиб, Қримнинг Украина ва Россия томонидан қабул қилиниши ўртасидаги туб фарқни айтди.
“Россия учун Қрим ҳар доим ҳарбий база бўлиб қолади. Украина учун Қрим хилма-хиллик макони ва бизни глобал жанубга элтувчи кўприкдир”, — деди Резников.
Аввалроқ Зеленский Украина қуролли кучларининг бўлажак қарши ҳужуми вазифаларидан бири Қримни озод қилиш эканини таъкидлаган. Бироқ президент тафсилотларни ошкор қилмаган ва кўп нарса Ғарб қуроллари етказиб берилишига боғлиқлигини айтган.
Изоҳ (0)