Жиззах шаҳрига яқин ҳудудда жойлашган Қорасойда 3 май куни Сан-Диегодаги Калифорния университети (UCSD) ва Ўзбекистон ФВВ ҳузуридаги Республика Сейсмологик башорат ва мониторинг маркази томонидан ўрнатилган сейсмик станция очилиш маросими бўлиб ўтди.
АҚШнинг Ўзбекистондаги элчихонаси матбуот хизматининг хабар беришича, станция ўрнатилишига деярли 2,5 йиллик тайёргарлик кўрилди.
Дунё бўйлаб 150 дан ортиқ станциядан иборат АҚШ Глобал сейсмик тармоғининг бир қисми сифатида ушбу станцияни АҚШ ҳукумати молиялаштиради. У АҚШ Миллий Илм-фан Жамғармаси кўмагида UCSD Халқаро Акселерометрни жойлаштириш дастури доирасида техник хизмат кўрсатиш ва ўқитиш билан таъминланади.
Ушбу станцияда тўпланган маълумотлар бутун дунё бўйлаб фойдаланувчилар, жумладан, олимлар, муҳандислар, талабалар ва кенг жамоатчилик учун қуйидаги веб-сайт орқали очиқ бўлади.
Хабарда таъкидланишича, станция Ўзбекистон ва Марказий Осиёда жаҳон сейсмик фаоллигини яхшироқ тушуниш учун яратилган. Станциядан олинган маълумотлар зилзилалар жойини аниқлаш ва улар келтириб чиқарадиган хавфларни камайтириш учун ишлатилиши мумкин, бу эса жамоат хавфсизлиги ва фундаментал фан учун муҳимдир.
Қорасойдаги доимий станция ГСН Калифорния штатидаги Сан-Диего университети ва Сейсмология қўшма тадқиқот институти томонидан биргаликда бошқарилади.
Маълумот учун, биринчи сейсмик станция 1901 йилда Тошкентда ишга туширилган ва Ўзбекистонда мунтазам инструментал сейсмологик кузатишлар бошланган. Тошкент зилзиласи (1966 йил) Ўзбекистонда сейсмологиянинг ривожланишида муҳим туртки бўлди. Ўзбекистонда зилзила ҳақидаги билимлар доираси кенгайди, сейсмик станциялар сони кўпайди.
Изоҳ (0)