Faoliyati davomida “Manchester Yunayted”, “Real Madrid”, “Milan”, “Los-Anjeles Gelaksi”, “PSJ” klublari va Angliya milliy terma jamoasi sharafini himoya qilgan Bekhem o‘z ismi atrofida brend yarata olgan futbol olamining dastlabki vakillaridan biri hisoblanadi. Jarima zarbalari ijro etish borasida futbol tarixidagi eng yaxshilardan biri hisoblangan Bekhem 2-may kuni 48 yoshni qarshi oldi. Quyida sobiq futbolchining faoliyat yo‘li haqida so‘z boradi.
Devid mebel ishlab chiqaruvchi Ted Bekhem va sartarosh Sandra Uest oilasida tug‘ilgan
Bekhemlar oilasi London yaqinidagi Leytonstoun shaharchasida yashagan. Devid futbol bilan shug‘ullanishni mahalliy jamoalarda boshlagan. Dastlab u otasi qo‘l ostidagi “Rijuey Rovers” jamoasida (Ted Bekhem klub asoschilaridan biri edi), keyinroq “Brimsdaun Rovers” va “Tottenhem”da mashg‘ulot o‘tkazgan.
Devidning ota-onasi “Manchester Yunayted”ga muxlislik qilardi va muntazam ravishda “Old Trafford”ga tashrif buyurardi. “Qizil iblislar”ga bo‘lgan muhabbat yosh Beksga ham o‘tdi. Futbolchi klubga 14 yoshida kelib qo‘shilgan — “Manchester Yunayted” uni o‘z akademiyasiga qabul qilgan. 1991-yilda Devid 16 yoshida mankunianlar bilan yoshlar shartnomasini imzolagan.
“Manchester Yunayted”dagi debyut va qator sovrinlar
“Manchester Yunayted” yoshlar jamoasi bilan 1992-yilda Angliya kubogida g‘alaba qozondi. Bekhem Niki Batt, Rayan Giggz, Gari Nevill, Fil Nevill va Pol Skoulz kabi afsonaviy “92-sinf”ning bir qismi bo‘lgan.
Xuddi shu 1992-yilda Devid Bekhem “Manchester Yunayted”ning asosiy jamoasi safida Angliya Liga Kubogida debyut qildi. Bir yil o‘tib “qizil iblislar” yarim himoyachi bilan professional shartnoma imzolagandi. Bekhem bir vaqtning o‘zida “Manchester Yunayted”ning yoshlar jamoasida o‘ynashni davom ettirdi va chempionlikni qo‘lga kiritdi, shuningdek, yana yoshlar o‘rtasidagi Angliya Kubogi finaliga chiqdi.
Bekhem 1994-yilda Chempionlar Ligasida debyut qilgan. O‘zining YCHLdagi ilk o‘yinida “Galatasaroy” darvozasiga gol urgan, “Manchester Yunayted” yirik 4:0 hisobida g‘alaba qozongandi. Shunga qaramay Bekhem “Yunayted”da asosiy tarkibdan muntazam joy olmagan. Shu sababli klub uni “Preston Nort End” jamoasiga ijaraga bergan. Ijara omadli bo‘ldi: Devid 5 ta o‘yinda 2 ta gol urdi, ularning bittasi burchak zarbasidan to‘g‘ridan-to‘g‘ri kiritilgandi.
1995-yilda futbolchi “Manchester Yunayted”ga qaytgan, APLda debyut qilgan va nihoyat asosiy tarkibdan joy egallashni boshlagan. Bekhemni jamoaga qo‘shish uchun “Manchester Yunayted” bosh murabbiyi Aleks Fergyuson o‘zining o‘ng qanot yarim himoyachisi Andrey Kanchelskisni sotib yuboradi. Futbolchi 1995/96-yilgi mavsumda “qizil iblislar” tarkibida 33 ta o‘yin o‘tkazgan va 8 ta gol urgan, shuningdek, Angliya chempionati va Kubogida g‘alaba qozongan. Yaxshi o‘yinlari sabab Angliya terma jamoasidan chaqiruv olgan va 1996-yilning 1-sentabrida debyut qilgan.
Bekhem “Manchester Yunayted”ni Fergyuson bilan mojaro sabab tark etgan
Devid uchun 1998/99-yilgi mavsum faoliyatidagi eng yaxshisi bo‘ldi. “Manchester Yunayted” Angliya chempionatida va Angliya Kubogida, shuningdek, Yevropa Chempionlar Ligasi finalida eng mashhur kambeklardan birini amalga oshirib chempion bo‘lgandi. Bekhem finalda jamoasi tomonidan kiritilgan ikkala golga ham assistentlik qilgan.
Aynan o‘sha yilda futbolchining shaxsiy hayotida ko‘p voqealar sodir bo‘lgan. Devid Spice Girls guruhi vokalisti Viktoriya Adams bilan turmush qurdi va 1999-yilda o‘g‘il farzandli bo‘ldi. Hozirda futbolchining 4 nafar farzandi bor. Bekhem uylanganidan keyin hayot tarzini o‘zgartirdi, qimmat avtomobillar sotib oldi va tez-tez soch turmagini o‘zgartirib turdi. Bu holat Aleks Fergyusonga yoqmadi.
Devid yaxshi o‘yin ko‘rsatganiga qaramay, Fergyuson bilan o‘rtadagi ziddiyat keskinlashib bordi. Ular o‘rtasidagi mojaroning eng yuqori nuqtasi 2003-yilda Angliya Kubogi doirasida “Arsenal”ga qarshi uchrashuvdagi mag‘lubiyatdan keyin bo‘ldi. Unda murabbiy futbolchining yuziga butsi otgandi.
“Menga uning yulduzlik statusi yoqmagandi. Faqatgina u maydondan tashqarida ham shon-shuhratga erishishni xohlardi”, — deb eslagandi keyinroq Aleks Fergyuson.
Ushbu voqeadan so‘ng Fergyuson “Manchester Yunayted” rahbariyatiga Bekhemni sotish iltimosi bilan murojaat qildi. Keyingi yilning yozida Devid 37 million yevro evaziga “Real”ga o‘tgandi.
Bekhem “Real”da “Gallaktikos” a’zosiga aylandi, lekin faqatgina 2 ta sovrin qo‘lga kiritdi
Devid Bekhem “Real Madrid”ga jamoaning eng yaxshi paytida o‘tgandek ko‘ringandi. Bu vaqtda Madrid klubida Luish Figu, Zinedin Zidan va Ronaldo kabi yulduzlar o‘ynardi. Bekhem “Real”ga barcha futbol yulduzlarini yig‘moqchi bo‘lgan Florentino Peres loyihasining bir qismi edi. “Qaymoqranglilar”ning bu tarkibi keyinchalik “galaktikos” deb atalgan.
Biroq maydondagi ishlar unchalik silliq kechmadi. Devid Madrid klubida o‘ynagan vaqtda jamoa 7 ta murabbiy almashtirdi, ammo bu natija keltirmadi. Bekham va “Real”ning yulduzli tarkibi faqatgina bir marta Ispaniya chempionatida g‘alaba qozondi va Ispaniya Superkubogini yutdi. Jamoa bu davrda biror marta ham Chempionlar Ligasi finaliga yetib bora olmadi.
Bekhem “Real” bilan yagona chempionligini jamoadagi so‘nggi mavsumida qo‘lga kiritgan. Muxlislar angliyalik futbolchi bilan shartnomani uzaytirishni xohladi, chunki Devid mavsumni yaxshi yakunlagandi. Lekin klub buni istamadi. “Qaymoqranglilar” angliyalik futbolchi bilan kelisha olmadi va u AQSH klubiga ko‘chib o‘tishga qaror qildi.
Bekhem AQSHda futbolga bo‘lgan qiziqishni oshirdi va MLS’ni o‘zgartirdi
Futbolchining “Los-Anjeles Gelaksi”ga o‘tishi katta shovqin keltirib chiqardi. OAVda Bekhem uchun kuchli reklama kampaniyasi boshlandi, liga esa o‘z qoidalarini o‘zgartirdi. Endi MLS’ning barcha klublariga maosh chegarasidan tashqarida bo‘lgan ikki futbolchini olib kelishiga ruxsat berildi. Yangi qoida Bekhem nomini oldi.
Bekhemning “Gelaksi” futbolchisi sifatidagi tanishtiruv marosimiga 5 ming muxlis va 700 jurnalist keldi. Futbolchi “Chelsi”ga qarshi o‘rtoqlik uchrashuvida debyut qildi. Devid o‘yinning katta qismini zaxirada o‘tkazdi, 78-daqiqada maydonga tushdi va darhol jarohat oldi.
Angliyalik futbolchining “Gelaksi” tarkibidagi birinchi mavsumlari qiyin o‘tdi. U tez-tez jarohat oldi va kam gol urdi. Keyin esa o‘yinchi qanchadir vaqtni Yevropada o‘tkazishga qaror qildi. Ikki marta ijara asosida “Milan”ga o‘tdi va Ronaldinyo, Pirlo kabi futbolchilar bilan birga o‘ynadi. “Gelaksi” muxlislari Bekhemni yoqtirmay qoldi va unga qarshi g‘azabli so‘zlar yozilgan bannerlar ko‘tarishni boshladi.
Ikkinchi marta ijaradan qaytganidan keyin futbolchi nihoyat “Gelaksi” uchun o‘ynashni boshladi. Beks chempionatda 15 ta, pley-offda 3 ta golli uzatmani amalga oshirdi va uning jamoasi MLS chempioniga aylandi. Muxlislar muhabbati qaytdi, bu esa Bekhemni yana bir mavsum AQSHda qolishiga sabab bo‘ldi.
2012-yilda “Gelaksi” yana MLS chempionligini qo‘lga kiritdi va Devid Amerikadagi futbolchilik faoliyatini yakunladi. Bekhem allaqachon 37 yoshga to‘lgan bo‘lsa ham Yevropa klublaridan takliflar oldi.
Devid Bekhem faoliyatidagi so‘nggi klub “PSJ” bo‘ldi
Futbolchi 2013-yilda 5 oylik shartnoma imzoladi va uning barcha maoshini bolalar xayriya tashkilotiga o‘tkazdi. Angliyalik futbolchi “PSJ” safida ko‘p o‘yin (14 ta) o‘tkazmagan bo‘lsa ham Fransiya chempioni bo‘ldi. 2013-yilning 16-may sanasida Devid Bekhem faoliyatini yakunlashini e’lon qildi.
“Jamoadoshlarim, menga ko‘p narsani o‘rgatgan murabbiylarim va meni qo‘llab-quvvatlagan muxlislardan minnatdorman”, — degandi angliyalik futbolchi.
Bekhem Angliya terma jamoasida 13 yil o‘ynadi, biroq birorta ham sovrin yuta olmadi
Futbolchi uchun terma jamoa safidagi birinchi katta turnir 1998-yilgi Jahon Chempionati bo‘ldi. Devid guruhdagi so‘nggi o‘yinda jarima zarbasidan gol urib, Angliyaning keyingi bosqichga chiqishiga yordam berdi. Argentinaga qarshi 1/8 final o‘yinida esa Maykl Ouenning goliga pas berdi. Lekin Bekhemning o‘zi hammasini buzdi. Yarim himoyachi 47-daqiqada Diyego Simeonega ishlatgan qo‘polligi uchun qizil kartochka olib maydondan chetlatildi. Uchrashuv durang bilan yakunlandi va penaltilar seriyasida Argentinaning qo‘li baland keldi.
Bekhem 2 ta Yevropa chempionati va 3 ta Jahon Chempionatida ishtirok etgan. Lekin bu vaqtda Angliya terma jamoasi biror marta ham chorak finaldan o‘ta olmagan. Devidning hisobida terma jamoada 115 ta o‘yin va 17 ta gol bor.
Izoh (0)