“Енгилмас” Флойд Мейвезер 8 вазн тоифасида чемпионликка эришган Мэнни Пакьяога қарши. “Аср жанги” дея эътироф этиладиган баҳс ҳақида (видео)

Бундан роппа-роса 8 йил аввал, 2015 йил 2 май санасида Ярим ўрта вазн қироллари америкалик боксчи Флойд Мейвезер ва филиппинлик Мэнни Пакьяо WBA, WBC ва WBO йўналиши бўйича чемпионлик камарлари учун рингга кўтарилганди. 

Қайд этиб ўтиш жоиз, жангга қадар бир неча йил ва бир неча бор музокаралар олиб борилган. Дастлабки музокаралар 2009 йилда бўлиб ўтганди. ESPN нашри Пакьяо Мейвезер билан жанг учун шартнома имзолаганини хабар қилди. Бироқ Пакьяо USADA организациясида допинг-тестлардан ўтишни хоҳламагани учун музокаралар барбод бўлади. 

Кейинги музокаралар 2010 йил 13 май куни Боб Арум 13 ноябрь санасида Пакьяо ва Флойд жанги бўлиб ўтишини маълум қилганди. Худди биринчисида бўлгани каби бу музокараларга ҳам допинг-тест можаролари халақит қилади. 

2014 йил 12 декабрь куни эса Мейвезер Меннига жанг ўтказишни таклиф қилади. Ва жанг 2015 йил 2 май санасига белгиланади. 

Жанг АҚШнинг Лас-Вегас шаҳридаги MGM Grand меҳмонхонаси аренасида бўлиб ўтган. 16,5 минг томошабинга мўлжалланган ушбу аренага чиқарилган чипталар бир дақиқада сотилиб кетган. 1500 дан 7500 долларгача чиқарилган чипталар “қора бозор”да 100 минг долларгача сотилган. Пакьяонинг ўзи яқинлари ва дўстлари учун 900 та чипта сотиб олишга 3—4 миллион доллар сарфлаган.

Мутахассислар томонидан “аср жанги” дея эътироф этилган бу баҳс бокс тарихидаги энг қимматбаҳо жангга айланди. Жанг натижасидан қатъи назар америкалик боксчи 150–180 миллион доллар, филиппинлик эса 100–120 миллион доллар гонорар олиши аниқ эди.

Жангга қадар Мейвезер ярим ўрта вазн тоифасида WBA ва WBC йўналишлари бўйича Жаҳон чемпиони эди. Пакьяода эса WBO йўналиши бўйича титул бор эди. 

Флойд фаолиятида 48-жангга ҳозирлик кўрган. Бундан аввалги 47 та жангнинг бирортасида мағлубиятга учрамаганди. 8 вазн тоифаси бўйича чемпионликка эришган Менни эса 65-жангига ҳозирлик кўрган ва унинг натижалари 57 та ғалаба, 2 та дуранг, 5 та мағлубият эди.

12 раунд давом этган жангда боксчилар асосан ҳимояга эътибор қаратди, якунда Флойд Мейвезер очколар эвазига ғалаба қозонди. Учала ҳакам ҳам америкалик боксчига ғалаба ёзди – 118:110, 116:112, 116:112.

Енгилмас Флойд Мейвезер 48-жангида 48-ғалабага эришди. WBO камарини бой бериб қўйган Мэнни Пакьяо эса 6-мағлубиятига учради.

Орадан йиллар ўца-да, бу тўқнашув “аср жанги” сифатида эътироф этилади. Ҳозирда Флойд Мейвезер рингни соғингани учун кўргазмали жангларда иштирок этиб турса, Мэнни Пакьяо эса сиёсатга қизиқиб кўрди. 2016 йилда Филиппин қуйи палатаси сенаторига айланди. 2020 йилнинг охирида ўнглар партияси бўлмиш “Лабан” раҳбарига айланди. 2022 йилги президентлик сайловларига эса ўз номзодини қўйганди. Бироқ якунда Филиппин диктатори Фердинанд Маркоснинг ўғли кичик Фердинанд Маркос мамлакат президентига айланди.