Ўзбекистон—Қирғизистон давлат чегарасидан ўтувчи ноқонуний ерости йўли қазиган фуқароларга суд ҳукми ўқилди, деб хабар беради ЎзА.
2022 йилнинг 23 июнь куни Давлат хавфсизлик хизмати ва ички ишлар органлари ходимлари ҳамкорлигида ўтказилган тезкор-қидирув тадбирлари натижасида ўзбек—қирғиз давлат чегарасидан ўтувчи яширин ерости йўли фош этилганди.
Дастлаб, маҳаллий фуқаро бошқарувидаги автомашина тўхтатилиб, кўздан кечирилганда, унда тегишли ҳужжатлари бўлмаган, умумий баҳоси 7 миллиард 603 миллион 650 минг сўмни ташкил қилувчи, 38 турдаги 2 707 дона мобил телефон аппаратлари борлиги аниқланган.
Сўнгра у вақтинча яшаб келаётган Риштон туманидаги хонадонда Қирғизистон ҳудудига олиб ўтувчи 10 метр пастликда, баландлиги 2 метр, кенглиги 1,2 метр, узунлиги 128 метр бўлган, тушиб-чиқиш учун лифт билан жиҳозланган ерости йўли борлиги аниқланган.
Маълум бўлишича, Данғара туманида яшовчи 32 ёшли ушбу шахс ўзбек—қирғиз давлат чегараолди ҳудудида жойлашган ҳовли уйлардан сотиб олиб, уларнинг кўча томон қисмларини баланд деворлар билан тўсган ва жиноий ҳаракатларини маскировка қилиш мақсадида ҳар иккала уйда, яъни Қирғизистон ҳудудидан сотиб олган хонадонда пенаблок ишлаб чиқаришни йўлга қўйган, Ўзбекистон ҳудудидан сотиб олган уйда эса чорвачилик ташкил этган.
Сўнгра Данғара туманида истиқомат қилувчи, 1984—1993 йиллар оралиғида туғилган 5 нафар фуқарони ерости йўли қазишга ёллаган.
Ерости йўли қуриб битказилганидан кейин, у орқали Қирғизистондан ноқонуний тадбиркорларнинг товар-моддий бойликларини, хусусан, мобил телефон аппаратлар, матолар, тиббиёт буюмлари ва дори воситаларини мамлакатга, Ўзбекистондан эса кўп миқдордаги хорижий валюта қимматликларини қўшни давлатга ўтказиш билан шуғулланган.
Аниқланган ушбу ҳолат юзасидан Давлат хавфсизлик хизматининг Фарғона вилояти бўйича бошқармаси томонидан жиноят иши қўзғатилиб, тергов ҳаракатлари олиб борилган.
Фарғона вилоят суди жиноят ишлари бўйича судлов ҳайъатининг ҳукми билан мазкур шахслар Жиноят кодексининг 182 ва 223-моддалари билан айбдор деб топилиб, уларнинг 3 нафарига 6 йилдан 7 йилгача бўлган муддатларга озодликдан маҳрум этиш жазоси, қолган 3 нафарига эса ахлоқ тузатиш ишлари жазоси тайинланган.
Шунингдек, жиноят иши доирасида ашёвий далил сифатида олинган 7 миллиард 603 миллион 650 минг сўмга баҳоланган 2 707 дона мобил телефон аппаратлари давлат эгалигига ўтказилиши белгиланган.
Бундан ташқари, Риштон тумани Қози Аҳрор МФЙ, А.Темур 3-тор кўчасида жойлашган умумий ер майдони 1 524 метр квадрат бўлган уй давлат эгалигига ўтказилиши ва ушбу уйдаги ерости йўли тегишли тартибда кўмиб ташланиши белгиланган.
Ноқонуний туннеллар
2022 йилнинг май ойида Қорасув туманида Қирғизистон ва Ўзбекистонни ерости йўли орқали боғлаб турувчи туннел топилгани хабар қилинганди. Ушбу туннел аниқланган ҳудуд эгаси Жалолобод туманининг “Қизилжар” посёлкасидаги руҳий касалликлар шифохонасида даволанаётгани сабаб унга нисбатан қайта тиббий текширув ўтказиш режалаштирилган.
7 июнь куни ҳам Қирғизистон хавфсизлик кучлари томонидан Ўзбекистон билан чегарада 155 метрлик ерости туннели аниқланган. 13 июнь куни эса учинчи туннел ҳам топилган. У орқали Қирғизистондан Ўзбекистонга валюта ва товарлар олиб ўтиш режалаштирилган. Қирғизистон томонининг маълум қилишича, ҳозирда тергов давом этмоқда.
Ўзбекистон томони эса яширин туннеллар қазиган шахсларга суд ҳукми ўқилгани ҳақида хабар берди. Уларга 6 йилдан 8 йилгача озодликдан маҳрум қилиш жазоси тайинланган.
Изоҳ (0)