O‘zbekiston—Qirg‘iziston davlat chegarasidan o‘tuvchi noqonuniy yerosti yo‘li qazigan fuqarolarga sud hukmi o‘qildi, deb xabar beradi O‘zA.
2022-yilning 23-iyun kuni Davlat xavfsizlik xizmati va ichki ishlar organlari xodimlari hamkorligida o‘tkazilgan tezkor-qidiruv tadbirlari natijasida o‘zbek—qirg‘iz davlat chegarasidan o‘tuvchi yashirin yerosti yo‘li fosh etilgandi.
Dastlab, mahalliy fuqaro boshqaruvidagi avtomashina to‘xtatilib, ko‘zdan kechirilganda, unda tegishli hujjatlari bo‘lmagan, umumiy bahosi 7 milliard 603 million 650 ming so‘mni tashkil qiluvchi, 38 turdagi 2 707 dona mobil telefon apparatlari borligi aniqlangan.
So‘ngra u vaqtincha yashab kelayotgan Rishton tumanidagi xonadonda Qirg‘iziston hududiga olib o‘tuvchi 10 metr pastlikda, balandligi 2 metr, kengligi 1,2 metr, uzunligi 128 metr bo‘lgan, tushib-chiqish uchun lift bilan jihozlangan yerosti yo‘li borligi aniqlangan.
Maʼlum bo‘lishicha, Dang‘ara tumanida yashovchi 32 yoshli ushbu shaxs o‘zbek—qirg‘iz davlat chegaraoldi hududida joylashgan hovli uylardan sotib olib, ularning ko‘cha tomon qismlarini baland devorlar bilan to‘sgan va jinoiy harakatlarini maskirovka qilish maqsadida har ikkala uyda, yaʼni Qirg‘iziston hududidan sotib olgan xonadonda penablok ishlab chiqarishni yo‘lga qo‘ygan, O‘zbekiston hududidan sotib olgan uyda esa chorvachilik tashkil etgan.
So‘ngra Dang‘ara tumanida istiqomat qiluvchi, 1984—1993-yillar oralig‘ida tug‘ilgan 5 nafar fuqaroni yerosti yo‘li qazishga yollagan.
Yerosti yo‘li qurib bitkazilganidan keyin, u orqali Qirg‘izistondan noqonuniy tadbirkorlarning tovar-moddiy boyliklarini, xususan, mobil telefon apparatlar, matolar, tibbiyot buyumlari va dori vositalarini mamlakatga, O‘zbekistondan esa ko‘p miqdordagi xorijiy valyuta qimmatliklarini qo‘shni davlatga o‘tkazish bilan shug‘ullangan.
Aniqlangan ushbu holat yuzasidan Davlat xavfsizlik xizmatining Farg‘ona viloyati bo‘yicha boshqarmasi tomonidan jinoyat ishi qo‘zg‘atilib, tergov harakatlari olib borilgan.
Farg‘ona viloyat sudi jinoyat ishlari bo‘yicha sudlov hayʼatining hukmi bilan mazkur shaxslar Jinoyat kodeksining 182 va 223-moddalari bilan aybdor deb topilib, ularning 3 nafariga 6 yildan 7 yilgacha bo‘lgan muddatlarga ozodlikdan mahrum etish jazosi, qolgan 3 nafariga esa axloq tuzatish ishlari jazosi tayinlangan.
Shuningdek, jinoyat ishi doirasida ashyoviy dalil sifatida olingan 7 milliard 603 million 650 ming so‘mga baholangan 2 707 dona mobil telefon apparatlari davlat egaligiga o‘tkazilishi belgilangan.
Bundan tashqari, Rishton tumani Qozi Ahror MFY, A.Temur 3-tor ko‘chasida joylashgan umumiy yer maydoni 1 524 metr kvadrat bo‘lgan uy davlat egaligiga o‘tkazilishi va ushbu uydagi yerosti yo‘li tegishli tartibda ko‘mib tashlanishi belgilangan.
Noqonuniy tunnellar
2022-yilning may oyida Qorasuv tumanida Qirg‘iziston va O‘zbekistonni yerosti yo‘li orqali bog‘lab turuvchi tunnel topilgani xabar qilingandi. Ushbu tunnel aniqlangan hudud egasi Jalolobod tumanining “Qiziljar” posyolkasidagi ruhiy kasalliklar shifoxonasida davolanayotgani sabab unga nisbatan qayta tibbiy tekshiruv o‘tkazish rejalashtirilgan.
7-iyun kuni ham Qirg‘iziston xavfsizlik kuchlari tomonidan O‘zbekiston bilan chegarada 155 metrlik yerosti tunneli aniqlangan. 13-iyun kuni esa uchinchi tunnel ham topilgan. U orqali Qirg‘izistondan O‘zbekistonga valyuta va tovarlar olib o‘tish rejalashtirilgan. Qirg‘iziston tomonining ma’lum qilishicha, hozirda tergov davom etmoqda.
O‘zbekiston tomoni esa yashirin tunnellar qazigan shaxslarga sud hukmi o‘qilgani haqida xabar berdi. Ularga 6 yildan 8 yilgacha ozodlikdan mahrum qilish jazosi tayinlangan.
Izoh (0)