Ўзбекистонда 2023 йилнинг ўтган даври мобайнида ичимлик ва оқова сув тармоқларига 407 та ўзбошимчалик билан уланиш ҳолатлари аниқланди. Бу ҳақда “Ўзсувтаъминот” АЖ матбуот хизмати хабар берди.
Қайд этилишича, 2022 йил ҳисобида “Ўзсувтаъминот” ҳамда унинг ҳудудий сув таъминоти корхоналари томонидан ичимлик ва оқова сув тизимларига жами 2 240 та ноқонуний уланиш ҳолатлари аниқланган бўлиб, мазкур қонунбузарликлар натижасида жами 41,5 миллиард сўмлик зарар етказилган.
Бунда энг юқори кўрсаткичлар қуйидаги ҳудудлар ҳисобига тўғри келади:
- Хоразм вилоятида — 940 та;
- Тошкент вилоятида — 572 та;
- Самарқанд вилоятида — 344 та.
2023 йилнинг ўтган даври мобайнида эса ичимлик ва оқова сув тармоқларига 407 та ўзбошимчалик билан уланиш ҳолатлари аниқланган бўлиб, унинг натижасида жами 3,9 миллиард сўмлик зарар етказилган.
Бундай ҳолатлар олдини олиш мақсадида Қашқадарё вилоятида ташкил этилган рейд тадбирларида магистрал қувурнинг ПК-28—ПК-770 оралиғидаги бешта нуқтада кўчма сув ҳисоблагич ёрдамида қувурдан ўтаётган сув ҳажми ўлчаниб, мазкур оралиқда суткасига 31 фоиз сув йўқотилаётгани аниқланган.
Ўзбекистонда сувни тежайдиган технологиялар
Апрель бошларида “Сув ресурсларидан фойдаланиш самарадорлигини ошириш бўйича кечиктириб бўлмайдиган чора-тадбирлар тўғрисида”ги президент қарори қабул қилинганди.
Қарорга кўра, 2023 йил 1 апрелдан қишлоқ хўжалиги маҳсулотларини етиштиришда сувни тежайдиган технологиялар жорий этишни давлат томонидан қўллаб-қувватлашнинг қуйидаги тартиби белгиланади:
- тижорат банклари кредитларининг гаров таъминоти 50 фоизгача, бироқ 2,5 миллиард сўмдан ортиқ бўлмаган миқдорда Тадбиркорлик фаолиятини қўллаб-қувватлаш давлат жамғармаси кафиллиги асосида таъминланади;
- тижорат банкларининг миллий валютада ажратиладиган, фоиз ставкаси Марказий банк асосий ставкасининг 1,5 бараваридан ошмаган кредитлари бўйича фоиз ставкасининг асосий ставкадан ошган, бироқ асосий ставканинг 30 фоизидан кўп бўлмаган қисмини қоплаш учун Жамғарма ҳисобидан компенсация тақдим этилади.
Изоҳ (0)