Йўл ҳаракати хавфсизлиги ижтимоий тармоқларда тарқалган Ўзбекистон шаҳарларида автомобиллар тезлиги яна соатига 70 километрга қайтарилиши ҳақидаги хабарларни рад этди. Таъкидланишича, ушбу хабарлар ҳақиқатга тўғри келмайди.
Ўзбекистон президентининг 2023 йил 28 февралдаги фармонига кўра, 1 апрелдан бошлаб Тошкент ва Нукус шаҳарларида ҳамда вилоят ва туманларнинг марказларида транспорт воситалари ҳаракатланишининг энг юқори тезлиги соатига 70 километрдан 60 километргача туширилиши белгиланган.
Шунингдек, Вазирлар Маҳкамасининг 3 апрелдаги 140-сон қарори билан Йўл ҳаракати қоидаларига ўзгартириш киритилган.
“Ушбу қоида ҳозир амалда. Ижтимоий тармоқ вакилларидан турли тахмин ва миш-мишлардан иборат асослантирилмаган маълумотларни тарқатмасликларини сўраймиз”, — дейилади муносабатда.
2022 йилнинг октябрида Халқ депутатлари Тошкент шаҳар кенгашининг 71-сессиясида пойтахтнинг Кичик ҳалқа автомобиль йўли ичида жойлашган барча кўчаларда транспорт воситаларининг ҳаракат тезлигини соатига 60 километргача чеклаш тўғрисида қарор қабул қилинганди. Доимий комиссия ва ИИББ ЙҲХБ томонидан Кичик ҳалқа автомобиль йўли ичида жойлашган барча кўчаларда транспорт воситаларининг ҳаракат тезлигини соатига 60 километргача чеклаш мақсадга мувофиқ деб топган.
Прогнозлаштириш ва макроиқтисодий тадқиқотлар институти экспертларига кўра, шаҳарларда энг юқори тезликни соатига 10 кмга камайтириш ўлим даражасини йилига 0,8 кишига (ҳар 100 000 кишига) камайтиришда ёрдам беради. Ўзбекистон учун бу 614 нафар инсоннинг ҳаётини сақлаб қолиш деганидир.
Изоҳ (0)