“Референдумда иштирок этиш ихтиёрий ва эркиндир” — Марказий сайлов комиссияси раиси

Ўзбекистонда 30 апрель куни соат 8:00 дан 10 минг 758 участкада Конституциянинг янги таҳрири бўйича референдум бошланди. Шунингдек, Ўзбекистоннинг 39 та хорижий давлатлардаги дипломатик ва бошқа ваколатхоналари ҳузурида тузилган 55 та референдум ўтказувчи участкалари, жумладан, Шарқ мамлакатларида ташкил этилган референдум участкалари иш бошлади.

Марказий сайлов комиссияси раиси Зайниддин Низомхўжаевнинг маълум қилишича, айни пайтда референдум ўтказувчи барча округлар ва участкалар ўртасида доимий алоқа ўрнатилган. Референдум бошланганидан бир соат давомида Марказий сайлов комиссиясига референдумга доир қонунчилик бузилгани ҳақида маълумотлар келиб тушмади.

Агарда референдумда овоз берувчи фуқаролар, кузатувчилар ёки оммавий ахборот воситалари вакиллари референдум қонунчилиги бузилиши ҳолатларини аниқлагудек бўлсалар, улар суд, прокуратура органлари ёки референдум комиссияларига мурожаат қилиши мумкин.

2023 йилги референдумда овоз бериш жараёнларини референдум участкасида ўрнатилган видеокамералар орқали амалга оширилаётган видео-трансляциядан реал вақт режимида (онлайн) кузатиб бориш имконияти яратилган. Марказий сайлов комиссиясининг Матбуот марказидаги экранларда, saylov.uz расмий веб-сайтида ҳамда Ўзбекистон Миллий телерадиокомпаниясининг “Ўзбекистон 24” ва бошқа телеканаллар орқали ҳам овоз бериш жараёнини узлуксиз кузатиш мумкин.

“Ўзбекистон Республикаси фуқароларини референдумда иштирок этишга ёки иштирок этмасликка мажбур қилиш мақсадида уларга, шунингдек хоҳиш-иродасини эркин билдиришига таъсир кўрсатишга ҳеч ким ҳақли эмас. Ҳар бир фуқаро бир овозга эга. Фуқароларнинг ўз хоҳиш-иродасини билдириши назорат қилинишига йўл қўйилмайди”, — дейди Зайниддин Низомхўжаев.

Референдумни жами 383 нафар халқаро кузатувчи, жумладан 14 та нуфузли халқаро ташкилотдан 184 нафар, 45 та давлатдан 199 нафар халқаро кузатувчилар бевосита кузатиб бормоқда. Бундан ташқари, сиёсий партиялар ва  фуқароларнинг ўзини ўзи бошқариш органларидан жами 43 мингдан ортиқ маҳаллий кузатувчилар бевосита кузатувда иштирок этмоқда.

Сайловчилар ягона электрон рўйхатига 19 миллион 722 минг 809 нафар овоз берувчи фуқаро киритилган.  Хорижий давлатларда тузилган 55 та референдум участкасидаги овоз берувчилар рўйхатига жами 307 минг 895 нафар фуқаро киритилган.

19—26 апрель кунлари бўлиб ўтган муддатидан олдин референдумда Ўзбекистоннинг 611 320 нафар фуқароси овоз берди.