Ўзбекистоннинг Гуанчжоу шаҳридаги Бош консуллиги дипломатлари “Юқори сифатли ривожланиш ва озиқ-овқат, мева-сабзавотлар импорти” мавзусига бағишланган тақдимотда иштирок этди.
Тадбирда Гуандун провинцияси мутасаддилари, шунингдек, Тижорат вазирлиги, Хитой халқаро савдони рағбатлантириш маркази ҳудудий департаменти, “Guanding (China) Imported Food Association” раҳбарияти, шунингдек, 100 дан ортиқ маҳаллий импортёр ва савдо тармоқлари вакиллари қатнашди.
Хитой вакиллари Ўзбекистонда бизнес вакиллари учун яратилган имкониятлар билан танишди. Шунингдек, ўзбек тадбиркорлари томонидан ишлаб чиқарилаётган юқори сифатли, экологик тоза маҳсулотларни Жанубий Хитой провинциялари бозорига етказиб бериш таклифлари билдирилди.
Шуни таъкидлаб ўтиш керакки, жорий йилнинг 21—23 сентябрь кунлари Гуанчжоу шаҳрида ўтказилиши режалаштирилган “Food2China Expo and the Guanzhao International Food & Ingrediyent Fair” кўргазмасида ўзбек ишлаб чиқарувчи ва экспортёрлари ҳам таклиф қилинди.
Ушбу кўргазмада иштирок этиш Ўзбекистон қайта ишланган қишлоқ хўжалиги маҳсулотларини 300 миллион кишилик Жанубий Хитой ҳудудига экспорти ҳажмини ошириш, янги импортёр ҳамкорлар топиш ва экспорт шартномалари имзолаш имконини беради.
Изоҳ (0)