Қорақалпоғистоннинг Тўрткўл туманида 24 апрель куни йигитлар ногирон укасини ургани учун ҳайдовчини калтаклади. Республика прокуратураси ҳолат юзасидан муносабат билдирди.
Маълум қилинишича, дастлаб фуқаро И.И. бошқарувидаги Malibu’да 1-гуруҳ ногирони Д.Б. бошқарувидаги Spark’нинг орқасидан қувиб келиб, тўхтатган. У ҳайдовчига ҳаракат давомида унга йўл бермаганини айтиб, юзига уриб, тан жароҳати етказиб, воқеа жойидан кетган.
Фуқаро Д.Б. ўзининг калтаклангани ҳақида акаси Д.М. ҳамда укаси Д.А.га хабар берганидан кейин ака-укалар вазиятга ойдинлик киритиш мақсадида И.И.ни телефон орқали туманнинг “Ёшлик” маҳалласидаги “Самарқанд” кўчаси бўйида жойлашган боғ олдида учрашувга чақирган.
Шу куни соат 18:00 да белгиланган жойда И.И. таниши Б.У. билан бирга борганида, ака-укалар Д.М. ва Д.А. “ногирон укамни нега урасан?” деб И.И. билан ўзаро тортишиб, уни уриб, тан жароҳати етказган.
Мазкур ҳолат Республика прокуратураси томонидан назоратга олиниб, Жиноят кодексининг 277-моддаси 2-қисми “б” банди билан жиноят иши қўзғатилган. Жиноят иши тергови Қорақалпоғистон Республикаси Ички ишлар вазирлиги Тергов бошқармаси иш юритувига топширилди. Тергов натижасига кўра, ҳар иккала томоннинг ҳаракатларига қонуний баҳо берилиши таъминланади.
Изоҳ (0)