Қирғизистон президенти Садир Жапаровнинг 17–19 май кунлари Пекинга ташрифи чоғида Хитой—Қирғизистон—Ўзбекистон темирйўли лойиҳасининг молиявий модели тасдиқланиши мумкин. Бу ҳақда “Ата Журт” парламент фракцияси ва “Mekenchil” депутатлар гуруҳининг қўшма йиғилишида Вазирлар Маҳкамаси раиси Ақилбек Жапаров маълум қилди.
Унга кўра, лойиҳанинг техник-иқтисодий асослари тайёр, уни мослаштириш ишлари олиб борилмоқда.
“Маълумки, Қазармангача темирйўл тор бўлади, кейин кенгайтирилади. У темирйўлнинг Ўзбекистон қисмига уланади. Лойиҳанинг қиймати 3-5 миллиард долларга баҳоланмоқда. Биргина Қирғизистон ҳудудида 57 та туннел қурилади”, — дейди у.
2022 йил июнда Қирғизистон президенти Садир Жапаров 20 йил давомида режалаштирилаётган Хитой—Қирғизистон—Ўзбекистон (CKU) темирйўли қурилиши жараёни ниҳоят олдинга силжиганини айтганди. “Жорий йилда техник-иқтисодий асосларни тайёрлаб, қурилишни 2023 йилда иш бошлаймиз. Учала давлат ҳам жараёнга тайёрланмоқда. Бу орқали иш ўринлари яратилади, иқтисодиётимиз эса юксалади”, — деган эди Жапаров.
Президент Шавкат Мирзиёев 2022 йилда ўтказилган Тошкент халқаро инвестиция форумининг очилиш маросимидаги нутқида ҳам ушбу темирйўл қурилишига тўхталиб ўтган.
“Ўзбекистонда ишлаб чиқарилаётган маҳсулотларни Ўзбекистон—Қирғизистон—Хитой темирйўли орқали Осиё—Тинч океани минтақасига етказиш учун имкониятлар яратиш бўйича амалий ҳаракатлар олиб борилмоқда”, — деган давлат раҳбари.
Ўзбекистон расмийлари аввалроқ темирйўл қуриб битказилгандан сўнг, бу Хитойдан Европа ва Яқин Шарққа юк ташиш учун энг қисқа йўл бўлиб, юк ташиш йўлини 900 километрга қисқартиришини ва 7-8 кунлик юк ташиш вақтини тежашини айтганди.
Хитой—Европа юк темирйўлининг жанубий қисмига айланадиган CKU йўналиши Хитой, Қирғизистон ва Ўзбекистонни Эрон ва Туркия орқали Марказий ва Шарқий Европага боғлайди. Режага кўра, темирйўлнинг умумий узунлиги қарийб 523 километрни ташкил этади. Жумладан, Хитойда 213 километр, Қирғизистонда 260 километр ва Ўзбекистонда 50 километрга яқин қисми қурилади.
Изоҳ (0)