Наманганда қарийб 4 минг доллар миқдоридаги қалбаки банкноталарни сотишга уринган шахс ушланди

Наманган вилояти Давлатобод туманида қалбаки хориж валютасининг муомалага киритилишига чек қўйилди, деб хабар беради вилоят ИИБ ахборот хизмати.

Қайд этилишича, 25 апрель куни вилоят ИИБ ЖҚБ, шаҳар ИИО ФМБ ЖҚБ ходимлари томонидан тезкор тадбир ўтказилган. Тадбирда Давлатобод тумани “Давлатобод” МФЙда жойлашган кўп қаватли уй олдида шу туманда яшовчи 43 ёшли фуқаро 39 дона қалбаки 100 АҚШ долларини 1 000 долларга алмаштираётган вақтида ушланган.

Ҳолат бўйича Давлатобод тумани ИИБ ҳузуридаги Тергов бўлими томонидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) 1-қисми билан жиноят иши қўзғатилган.

Қалбаки пуллар муомаласи

Апрель бошларида Тошкент шаҳри Янгиҳаёт туманида харидор қалбаки пулга iPhone сотиб олгани, Тошкент вилояти Ангрен шаҳрида қалбаки пуллар муомалага киритилишининг олди олингани тўғрисида хабар берилганди. 

2022 йил ноябрида Наманган вилоятида қалбаки 8 300 долларни муомалага киритишга уринган шахс ушланган эди. Декабрда бўлса Наманганда МИБ идорасида қалбаки 10 000 доллар ёқиб юборилган