Россия камикадзе дронлари эвазига Эрон билан ўзининг электрон разведка соҳасидаги ишланмаларини ўртоқлашган. Бу ҳақда The Wall Street Journal манбалари хабар бермоқда.
Нашрнинг Америка ва Эрон расмийлари орасидаги суҳбатдошлари айтишича, Россия ва Эроннинг кибертехнологиялар соҳасидаги ҳамкорлиги Теҳрон Москвага дронлардан ташқари қисқа масофага учувчи ракеталар, шунингдек, танк ва артиллерия снарядлари етказиб беришга келишиб олганидан кейин фаоллашган. Бунинг эвазига Эрон нафақат киберқуроллар, балки Россия вертолётлари, қирувчи самолётлари ва узоқ масофали ракеталарини ҳам олиши кутилмоқда.
Икки йил аввал Россия ва Теҳрон киберсоҳада ҳамкорлик тўғрисида битим тузган эди, бироқ Москва ўзининг электрон технологияларини Теҳронга беришга анча вақт қаршилик қилган, чунки улар даркнетда сотувга қўйилади. Аммо Украинага кенг миқёсли босқин бошланганидан сўнг, Россия Эронга алоқаларни кузатиш, эшитиш ва фотографик қурилмалар соҳасида ўзининг ишланмаларини тақдим этди. WSJ манбаларига кўра, Москва аллақачон Теҳронга мухолифатчилар ва диссидентларнинг мобил телефонлари ва компьютерларини бузишга мўлжалланган дастурий таъминотни улашган. Россия расмийлари Эрон билан ҳарбий алоқаларни ривожлантиришнинг афзалликлари унинг камчиликларидан устун туради, деган хулосага келган.
Газетанинг Торонто университети Citizen Lab тадқиқот маркази ҳужжатларига таяниб ёзишича, Россиянинг Protei Ltd компанияси Эроннинг Ariantel уяли алоқа операторига интернет-цензура дастурларини етказиб беришни бошлаган.
Киберхавфсизлик бўйича таҳлилчиларнинг фикрига кўра, Protei Ltd ҳукуматларга телефон алоқалари, электрон почта ва кредит карта транзакцияларини кузатишда ёрдам бериш учун мўлжалланган аппарат ва дастурий таъминотни ишлаб чиқади. Компания Россия Мудофаа вазирлиги билан шартномаларга эга.
Россия урушда Эрон қуролларидан фойдаланмоқда
Россия Украинадаги урушда Эрон қуролларидан фаол фойдаланмоқда. 2022 йил кузидан бошлаб Россия Мудофаа вазирлиги Украинадаги ҳарбий ва энергетика объектларига ҳужум қилиш учун Эронда ишлаб чиқарилган Shahed-131/136 камикадзе-дронларидан фойдаланмоқда, рус ҳарбийлари уларнинг номини “Геран-1” ва “Геран-2” деб ўзгартиради.
2023 йилнинг февралида The Guardian газетаси Эрон Россияга қайта фойдаланиш мумкин бўлган узоқ масофали ҳужумчи дронлар партиясини топширганини ёзганди. Ғарб оммавий ахборот воситалари Россия ва Эрон расмийлари Россия ҳудудида дронларни ишлаб чиқарувчи завод қуриш имконияти бўйича келишиб олгани ҳақида бир неча бор ёзган.
Шунингдек, Эрон Россияга учиш масофаси мос равишда 300 ва 700 километрни ташкил этувчи “Фатеҳ-110” ва “Зулфиқор” баллистик ракеталарини етказиб бермоқчилиги хабар қилинган.
Изоҳ (0)