Охирги олти ой ичида Эрон Россияга 300 мингга яқин артиллерия снарядлари ва миллионта ўқ-дори юборган, деб ёзмоқда The Wall Street Journal Яқин Шарқдаги манбаларига таяниб.
Нашрнинг ёзишича, қурол-аслаҳалар Россия кемалари томонидан Каспий денгизи орқали етказиб берилмоқда. Журналистларга маълум бўлган охирги партия 2023 йил март ойи бошида Эронни тарк этган. Газета манбаларига кўра, ўшанда Россиянинг “Расул Гамзатов” юк кемаси бортида икки мингга яқин артиллерия ўқлари бор эди.
Газетанинг қайд этишича, юклар Астрахан портида туширилгандан сўнг кема Эронга қайтган, шундан сўнг март ойи охирида яна Россияга жўнаб кетган.
Эрон Россияга яширинча ўқ-дорилар етказиб бергани ҳақида аввалроқ Sky News телеканали хабар берганди. Унга кўра, 2023 йил январь ойида “Муса Жалил” ва “Бегей” юк кемалари Эрон портидан Россияга қурол ортилган 200 га яқин транспорт контейнерларини олиб кетган. Sky News манбасига кўра, бу таъминот ичида 100 миллионта патрон, 300 мингга яқин снарядлар, гранаталар, миномёт ва пулемётлар, шунингдек, 10 мингга яқин зирҳли нимча ва дубулғалар бўлган. Журналистлар билан суҳбатлашган экспертлар бу кўрсаткичларни жуда юқори, деб баҳолади.
2022 йил кузида Эрон Россияга “Фатеҳ-110” ва “Зулфиқор” баллистик ракеталарини етказиб бермоқчи экани маълум бўлганди. Март ойи бошида Financial Times газетаси Россиянинг кейин АҚШ Украинага узоқ масофага учувчи ATACMS ракеталарини етказиб бера бошлашидан қўрқиб, Эрондан ҳалигача баллистик ракета сотиб олмаётгани ҳақида ёзди.
Изоҳ (0)