Таиландда ҳаво рекорд даражада исиди. Аҳолидан кўчага чиқмаслик сўралмоқда

Таиланда кузатилаётган экстремал об-ҳаво шароити инсон танаси бардош бера олмайдиган даражага етмоқда. Бу ҳақда Reuters хабар берди.

Мутахассислар жазирама ёз охиригача давом этиши ва бу одамларнинг саломатлигига салбий таъсир қилишидан огоҳлантирмоқда. Юқори ҳарорат ва намликда инсон танаси совиши қийинлашади, чунки нам ҳавода тер буғланиб кета олмайди.

Бу организм учун жиддий муаммоларга олиб келиши мумкин, чунки 40 даражадан юқори ҳароратда тана гипертермик бўлади. Бу юракнинг тез уриши, ҳушдан кетиш ва ҳатто кома ҳолатига ҳам олиб келиши мумкин.

Таиланд ҳукумати шу сабабли одамларни уйда қолишга чақирмоқда, чунки айрим жойларда иссиқлик индекси аллақачон 54 даражага чиққан. Метеорология департаменти бутун мамлакат бўйлаб огоҳлантиришлар эълон қилган.

Мамлакат шарқида, шунингдек, жанубий ва Пхукет оролида иссиқлик индекси Цельсий бўйича 54 даража атрофида бўлиши прогноз қилинмоқда. Бангкокда сўнгги бир неча кун ичида ҳарорат Цельсий бўйича 37 даража атрофида бўлган, бу намлик билан бирга 40 даражани ташкил қилади.

Ҳаво ҳароратининг исиши оқибатида юзага келиши мумкин бўлган ёнғинлар, деҳқонлар томонидан далаларнинг ноқонуний ёндирилиши ҳаво сифатининг ёмонлашишига олиб келиши мумкин.