Эронда полиция намойишчиларга қарата ўт очди

Эрон жануби-шарқидаги Систан ва Балужистон вилоятида ўсмир йўл-транспорт ҳодисасида ҳалок бўлганидан кейин полиция бўлими олдида намойишчилар тўпланди. Полиция уларга қарата ўқ узди, деб хабар бермоқда “Озодлик” радиосининг Европа хизмати.

26 апрелга ўтар кечаси Систон ва Балужистон вилоятининг Фануж шаҳрида полиция машинаси икки мототциклчини уриб юборган. Ҳодиса оқибатида 16 ёшли маҳаллий фуқаро ҳалок бўлган, яна уч киши жароҳатланган.

Воқеага жавобан маҳаллий аҳоли полиция бўлими олдида норозилик намойиши уюштирди. Хавфсизлик кучлари оломонга қарата ўқ узишни бошлади, оқибатда уч киши яраланди.

Эрон полицияси норозилик намойиши ва отишмани тасдиқлади ҳамда буни айрим намойишчилар полиция бўлимига “тош ва шиша отгани” билан оқлади.

Эслатиб ўтамиз, Систон ва Балужистон Эронда ўтган йилнинг кузидан бери мунтазам равишда ҳукуматга қарши намойишлар ўтказилаётган ягона вилоятдир. Декабрга келиб, ҳукуматга қарши намойишлар ушбу вилоятдан ташқари деярли ҳамма жойда пасайган эди. Минтақадаги аксилҳукумат ҳаракатларининг асосий йўналиши вилоятнинг маъмурий маркази Захидон шаҳрида олиб борилмоқда.

Эрондаги оммавий намойишлар

Эронда оммавий норозилик намойишлари сентябрь ойида бошланган эди. Уларнинг бошланишига 22 ёшли Маҳса Аминийнинг ўлими сабаб бўлди — у ҳижобни “нотўғри” ўрагани учун полиция ўринбосари томонидан ҳибсга олинганидан кўп ўтмай вафот этган. Дастлаб, намойишчилар гендер тенглик талаб қилишди, лекин кўп ўтмай уларнинг талаблари кенг кўламли ислоҳотлар ва режим ўзгаришини ўз ичига ола бошлади.

Эрон ҳукумати норозилик намойишларини ўта шафқатсизлик билан жумладан, ҳарбий қуроллар ёрдамида бостирди. Ўн минглаб одамлар ҳибсга олинган; ҳуқуқ ҳимоячиларининг сўзларига кўра, хавфсизлик кучлари билан тўқнашувларда 450 дан ортиқ намойишчи ҳалок бўлган. Айбловлар бўйича юздан ортиқ одам ўлимга ҳукм қилиниши мумкин.

Бундан ташқари Эронда ҳукуматга қарши намойишларда қатнашган ўқувчи қизларнинг заҳарланиши ҳолатлари кузатилмоқда.