Польша шимолида номаълум “ҳаво ҳарбий объекти” қолдиқлари топилди, деди Адлия вазири Збигнев Зебро. Унга кўра, объект бўлаклари Бидгош шаҳри яқинидаги ўрмондан топилган.
Польша Миллий мудофаа вазирлигининг аниқлик киритишича, “вазият аҳоли хавфсизлигига таҳдид солмайди”.
РМФ ФМ радиостанцияси журналистларининг таъкидлашича, аниқланган объект — “ҳаво-ер” синфидаги ракета. Унинг бўлаклари икки кун аввал топилган, бироқ ракета Польша ҳудудига “анча вақт олдин” қулаган бўлиши мумкин. Журналистларнинг сўзларига кўра, ракетанинг узунлиги бир неча метр бўлиб, ерга санчилиб қолган, унинг устида рус тилидаги ёзувлар аниқланган.
2022 йил ноябрь ойида Россия қўшинларининг Украинага кенг кўламли зарбаси пайтида Польша ҳудудига ракета қулаган эди, оқибатда икки киши ҳалок бўлган. Дастлаб, ракета Россия томонидан учирилган деб тахмин қилинган, аммо тез орада Ғарб давлатлари бу Украина ҳаво ҳужумидан мудофаа тизимининг рус ракетасини қайтариш учун отган ракетаси деган хулосага келди. Украина ракета Россияники эканини бир неча бор таъкидлади. Ғарбдагилар ракетанинг қулаши учун жавобгарлик Россия зиммасида экани, чунки Украинадаги урушни айнан у бошлаганини айтишди.
Изоҳ (0)