Сурхондарё вилояти Сариосиё туманида мактаб директори бир неча шахслар томонидан калтаклангани айтилмоқда. Вилоят прокуратураси мазкур хабарларга изоҳ берди.
Аниқланишича, 2023 йилнинг 6 февраль куни Сариосиё туманидаги 77-мактабда ўтказилган ота-оналар йиғилишига борган фуқаро М.С. мактаб директорининг ўқув-тарбиявий ишлар бўйича ўринбосари Х.Кенжаев билан жанжаллашиб қолган. Шунингдек, у жанжал вақтида безорилик ҳаракатларининг олдини олмоқчи бўлган мактаб директори Р.Салохиддиновни уриб, унга тан жароҳати етказган.
Мазкур ҳолат юзасидан 1 март куни Сариосиё туман ИИБ ҳузуридаги тергов гуруҳи томонидан фуқаро М.С.га нисбатан Жиноят кодексининг 277-моддаси 3-қисми “г” банди билан жиноят иши қўзғатилиб, тергов ҳаракатлари олиб борилган.
Р.Салоҳиддиновни М.С.дан ташқари бошқа фуқаролар ҳам ургани ҳолати тергов ҳаракатлари давомида тўпланган далиллар билан тасдиқланмаган. Жиноят иши бўйича 1 апрелда фуқаро М.С.га нисбатан Жиноят кодексининг 277-моддаси 3-қисми “г” банди билан айблов эълон қилиниб, мазмунан қўриб чиқишлик учун 4 апрелда жиноят ишлари бўйича Сариосиё туман судига юборилган ва ҳозирда суд мажлисида кўрилмоқда.
Р.Салохиддиновнинг 27 мартда вилоят Мактабгача ва мактаб таълими бошқармаси бошлиғи номига ўз хоҳишига кўра ишдан бўшатиш ҳақидаги ёзган аризасига асосан, у билан тузилган меҳнат шартномаси 30 мартдан бекор қилинган.
Аввалроқ Сурхондарё вилояти Денов тумани “Даҳана” маҳалласида жойлашган 57-мактабнинг 3-синф ўқувчиси қотиллик қурбони бўлгани ҳақида хабарлар тарқалган эди. Вилоят прокуратураси ҳолат юзасидан муносабат билдирган.
Шунингдек, вилоятнинг Сариосиё тумани халқ таълим бўлими мудири ҳудуддаги мактаблардан бирининг директорини ҳақорат қилган эди.
Изоҳ (0)