Шавкат Мирзиёев 27 апрель куни Тошкент халқаро инвестиция форуми доирасида Ислом тараққиёт банки президенти Муҳаммад бин Сулаймон ал-Жассирни қабул қилди, деб хабар бермоқда Президент матбуот хизмати.
Хабарда айтилишича, Ўзбекистон президенти ITБ билан янги шериклик дастурини биргаликда амалга ошириш муҳимлигини қайд этди. Янги ўрта муддатли шериклик дастури доирасида Банк гуруҳи билан кенг кўламли ҳамкорликни янада кенгайтириш масалалари муҳокама қилинди.
Бугунги кунда қўшма лойиҳалар портфели иқтисодиётнинг устувор тармоқларини қамраб олган ҳолда 1,3 миллиард доллардан ошгани мамнуният билан қайд этилди. Forum доирасида қишлоқ ва транспорт инфратузилмасини модернизация қилиш, мактабгача таълимни ривожлантириш бўйича лойиҳаларни амалга ошириш юзасидан умумий қиймати 400 миллион долларлик битимлар имзоланди.
Учрашувда амалий ҳамкорликни ривожлантириш, тадбиркорлик ва хусусий инвестицияларни қўллаб-қувватлаш, молиявий воситаларни такомиллаштириш, Банк тузилмаларини лойиҳа ишларига фаол жалб қилиш борасида аниқ лойиҳаларни илгари суриш, шунингдек, Ўзбекистоннинг ЖСТга қўшилиши ва инновацион экотизимни яратиш масалаларида техник кўмакни кенгайтиришга алоҳида эътибор қаратилди.
Иккинчи Тошкент халқаро инвестиция форуми ҳақида
Ушбу форум 27—28 апрель кунлари бўлиб ўтади. Тадбирда 70 мамлакатдан келган 2,5 мингга яқин ишбилармон доиралар ва банк-молия соҳаси вакиллари иштирок этади. Давлат раҳбари форум доирасида яна бир қатор икки томонлама учрашувлар ўтказади.
Президент Шавкат Мирзиёев ушбу форум ялпи мажлисида нутқ сўзлаб, хорижий компаниялар ва тадбиркорлар ҳақида гапирди. Хусусан, “янги-янги инвесторлар билан тез-тез учрашувлар ўтказишга, сизларнинг юртимиздаги ютуқларингизни шахсан кафолатлашга тайёрман” деб айтди.
Ўзбекистонда илк бор Халқаро тижорат суди фаолияти йўлга қўйилишини маълум қилди. Мамлакат Жаҳон савдо ташкилотига тезроқ аъзо бўлиб киришдан манфаатдор эканини қайд этди.
Андижон, Наманган, Бухоро ва Урганч аэропортлари бошқарувини хусусий секторга топширилиши, темирйўл соҳасида ҳам катта ўзгаришлар бошланганини билдириб, бунда инвесторларни фаол иштирок этишга чақирди.
Изоҳ (0)