Тошкент шаҳар ҳокими вазифасини бажарувчи Шавкат Умурзоқов ва Abu Dhabi Sewerage Services Company (ADSS) мутасаддилари оқава сувларни тўплаш ва тозалаш мақсадида қуриладиган янги иншоот масаласини муҳокама қилди, деб хабар беради Тошкент шаҳар ҳокимлиги матбуот хизмати.
Учрашувда АDSS компаниясининг сотувлар бўйича ижрочи директори Абдулваҳоб ал-Шариф ҳокимлик масъулларига Тошкент вилояти Қуйи Чирчиқ туманининг “Сурум” МФЙ ҳудудида барпо этилиши режалаштирилган Оқава сувларни йиғиш ва тозалаш иншоотининг дастлабки лойиҳасини тақдим этиб, уни такомилига етказиш учун баъзи техник ва ташкилий-ҳуқуқий масалаларни биргаликда ҳал этиш лозимлигига эътибор қаратган.
Маълум қилинишича, 2 босқичли лойиҳа суткасига 1,5 миллион метр куб чиқиндиларни тўплаш ҳамда тозалаш имконини беради. Эътиборли жиҳати, “Ўзсувтаъминот” АЖ билан биргаликда амалга ошириладиган бу лойиҳа фақатгина тозалаш иншоотини қуришни эмас, балки ҳозирда мавжуд тозалаш иншоотларига йўналтирилган барча марказий қувурларни интеграция ва модернизация қилишни назарда тутади. Бу бўйича ҳам намунавий, камчиқим ва амалга оширилиши қисқа вақт талаб этадиган таклифлар тайёрланган. Лойиҳа мукаммал бўлиши учун топографик сёмка, шаҳар аҳолисининг ўсиш прогнози каби қатор маълумотлар керак. Режага кўра, 2024 йилнинг январидан иншоот қурилиши бошланади.
Шавкат Умурзоқов ҳамкорларни қизиқтирган саволларга тегишли ташкилот масъуллари томонидан қисқа муддатда зарур маълумотлар етказиб берилишини билдирган. Ўз навбатида, бу лойиҳа Тошкент шаҳри учун ниҳоятда долзарб эканига эътибор қаратиб, уни имкон қадар тез ва сифатли амалга ошириш муҳимлигини таъкидлаган. Янги Тошкент ҳам шу тизимга уланишини билдириб, ундаги объектлар фойдаланишга топширилгунига қадар инфратузилма тайёр бўлиши муҳимлигини айтиб ўтган.
Март ўрталарида Тошкент шаҳар ҳокими вазифасини бажарувчи Бахтиёр Раҳмонов ҳам БААнинг Abu Dhabi Sewerage Services Company бошқарувчи ва бош ижрочи директори Аҳмад Ал Шамси бошчилигидаги компания мутасаддилари билан учрашганди. Февраль ойида республика аҳолисини марказлашган ичимлик суви билан таъминлаш даражаси 77 фоизга етказилиши тўғрисида хабар берилганди. Йилдан йилга ўтувчи 54 ва янгидан бошланувчи 17 та объектда 105 та иншоот ва 1,4 минг километр ичимлик ва оқова сув тармоқлари қурилади.
Изоҳ (0)