Toshkent shahar hokimi vazifasini bajaruvchi Shavkat Umurzoqov va Abu Dhabi Sewerage Services Company (ADSS) mutasaddilari oqava suvlarni to‘plash va tozalash maqsadida quriladigan yangi inshoot masalasini muhokama qildi, deb xabar beradi Toshkent shahar hokimligi matbuot xizmati.
Uchrashuvda ADSS kompaniyasining sotuvlar bo‘yicha ijrochi direktori Abdulvahob al-Sharif hokimlik mas’ullariga Toshkent viloyati Quyi Chirchiq tumanining “Surum” MFY hududida barpo etilishi rejalashtirilgan Oqava suvlarni yig‘ish va tozalash inshootining dastlabki loyihasini taqdim etib, uni takomiliga yetkazish uchun ba’zi texnik va tashkiliy-huquqiy masalalarni birgalikda hal etish lozimligiga e’tibor qaratgan.
Ma’lum qilinishicha, 2 bosqichli loyiha sutkasiga 1,5 million metr kub chiqindilarni to‘plash hamda tozalash imkonini beradi. E’tiborli jihati, “O‘zsuvta’minot” AJ bilan birgalikda amalga oshiriladigan bu loyiha faqatgina tozalash inshootini qurishni emas, balki hozirda mavjud tozalash inshootlariga yo‘naltirilgan barcha markaziy quvurlarni integratsiya va modernizatsiya qilishni nazarda tutadi. Bu bo‘yicha ham namunaviy, kamchiqim va amalga oshirilishi qisqa vaqt talab etadigan takliflar tayyorlangan. Loyiha mukammal bo‘lishi uchun topografik syomka, shahar aholisining o‘sish prognozi kabi qator ma’lumotlar kerak. Rejaga ko‘ra, 2024-yilning yanvaridan inshoot qurilishi boshlanadi.
Shavkat Umurzoqov hamkorlarni qiziqtirgan savollarga tegishli tashkilot mas’ullari tomonidan qisqa muddatda zarur ma’lumotlar yetkazib berilishini bildirgan. O‘z navbatida, bu loyiha Toshkent shahri uchun nihoyatda dolzarb ekaniga e’tibor qaratib, uni imkon qadar tez va sifatli amalga oshirish muhimligini ta’kidlagan. Yangi Toshkent ham shu tizimga ulanishini bildirib, undagi obyektlar foydalanishga topshirilguniga qadar infratuzilma tayyor bo‘lishi muhimligini aytib o‘tgan.
Mart o‘rtalarida Toshkent shahar hokimi vazifasini bajaruvchi Baxtiyor Rahmonov ham BAAning Abu Dhabi Sewerage Services Company boshqaruvchi va bosh ijrochi direktori Ahmad Al Shamsi boshchiligidagi kompaniya mutasaddilari bilan uchrashgandi. Fevral oyida respublika aholisini markazlashgan ichimlik suvi bilan ta’minlash darajasi 77 foizga yetkazilishi to‘g‘risida xabar berilgandi. Yildan yilga o‘tuvchi 54 va yangidan boshlanuvchi 17 ta obyektda 105 ta inshoot va 1,4 ming kilometr ichimlik va oqova suv tarmoqlari quriladi.
Izoh (0)