2023-yildan O‘zbekiston hududlarining muhandislik-kommunikatsiya va ijtimoiy infratuzilma tizimi hamda xizmat ko‘rsatish va servis sohalari rivojlantiriladi. Bu jamoatchilik muhokamasiga qo‘yilgan 2023-yilgi davlat dasturi loyihasining 34-maqsadida ko‘zda tutilgan.
Qayd etilishicha, respublikadagi ko‘p kvartirali uylarning markazlashgan issiqlik ta’minoti tizimini rivojlantirish, energiya tejamkor texnologiyalarni keng joriy etish va energiya samaradorligini oshirish maqsad qilingan. Shu sababli:
- barcha shahar va tumanlardagi markaziy ko‘chalar, chorrahalar va aholi gavjum maskanlarda zamonaviy sanitariya-gigiyena shoxobchalari joylashtiriladigan joylar aniqlanadi;
- zamonaviy sanitariya-gigiyena shoxobchalari tarmog‘ini tashkil etish ishlariga mahalliy va xorijiy tadbirkorlik subyektlari keng jalb qilinadi;
- mazkur yer maydonlarini tadbirkorlik subyektlariga ajratish hamda ularning infratuzilma tarmoqlariga (suv, elektr energiyasi, oqava tarmog‘iga) ulanishiga ko‘maklashiladi.
Bundan tashqari, respublika aholisini markazlashgan ichimlik suvi bilan ta’minlash darajasi 77 foizga yetkaziladi. Yildan yilga o‘tuvchi 54 ta va yangidan boshlanuvchi 17 ta obyektlarda 105 ta inshootlar va 1,4 ming kilometr ichimlik suv va oqova suv tarmoqlari quriladi.
Topshiriqlar ijrosi 2023-yil davomida amalga oshiriladi. Xarajatlar respublika budjeti mablag‘lari hisobidan qoplanadi. Qurilish va uy-joy kommunal xo‘jaligi vazirligi, Iqtisodiyot va moliya vazirligi ijro uchun mas’ul etib belgilandi.
Izoh (0)