Toshkent shahrining Shayxontohur tumanidagi “Ilg‘or” mahallasining Bog‘ 2-tor ko‘chasida yashovchi aholi vakillari “Daryo”ga murojaat qilib, mahallaning katta ko‘chaga olib chiquvchi asosiy ko‘chasi 2016-yilda yopilgani bois mahalladagi mavjud 20-30 ta tor ko‘cha aholisi ikkinchi tor ko‘cha orqali Nurafshon ko‘chasiga chiqayotganini, bu esa tirbandliklardan bezor bo‘lgan aholi noroziligi-yu yosh bolalar hayotiga xavf solayotganini bildirmoqda.
“Daryo” jurnalisti voqea tafsilotlarini o‘rganish maqsadida ushbu ko‘chada bo‘ldi.
“Nurafshon ko‘chasi ochilishi munosabati bilan mahalladan katta ko‘chaga olib chiquvchi barcha tor ko‘chalarni yopib tashlashgani bois bizning ko‘chada mashinalar oqimi ortdi. Eng yomoni, haydovchilar bir-biriga yo‘l bermaydi. Ertalab va kechki payt rosa tiqilinch bo‘ladi. Baʼzi haydovchilar esa katta tezlikda yurishadi. Yosh bolalarimiz shu ko‘chada o‘ynaydi. Velosiped haydaydi. Shu sabab ham mashinalar oqimining ortishi bolalar hayoti uchun xavfli bo‘lib qoldi. Masʼullar 1-, 3- va 4-ko‘chalarni ochib yuborib, bizning ko‘chadagi mashinalar oqimini kamaytirishlarini so‘raymiz”, — deydi Ravil aka ismli suhbatdosh.
Shu mahallada yashovchi Yo‘ldosh Ro‘ziyevning aytishicha, asosiy Bog‘ ko‘cha yopib tashlangani bois nafaqat “Ilg‘or” mahallasidagi tor ko‘chalar, “Tinchlik” mahallasida yashovchi aholi ham katta ko‘cha tirband bo‘lgan paytda aynan shu — ikkinchi tor ko‘cha orqali Nurafshon ko‘chasiga o‘tib-qaytadi.
“Asosiy bog‘ ko‘chaning yopib tashlangani sabab barcha tor ko‘chalar, ‘Tinchlik’ mahallasida yashovchi odamlar ham mashinasida aynan bizning 2-tor ko‘cha orqali Nurafshon ko‘chasiga o‘tib-qaytadi. Biz esa bolalarimiz, nabiralarimiz taqdiridan xavotirda o‘tiramiz. Bizni bezovta qilib tashlashdi”, — deydi Yo‘ldosh Ro‘ziyev.
Shu mahallada yashovchi Sabohat Zokirovaning aytishicha, hududdagi mavjud 20 dan ortiq xonadon vakillari bolalarining ko‘chaga chiqib o‘ynashidan qo‘rqib, yurak hovuchlab o‘tiradi.
“Bolalarimiz to‘p olib chiqib, o‘ynaymiz deyishsa, mashina kelib qoladi. Mahallamizda bolalar o‘yingohi yo‘qligi bois ko‘chada o‘ynaymiz deydi”, — deydi Sabohat Zokirova.
Aholining “Daryo”ga bildirishicha, ular bu muammo yuzasidan tuman hokimligi va masʼul tashkilot rahbarlariga murojaat qilib, shikoyatdan xabardor qilgan.
“Murojaat qildik, mablag‘ bilan bog‘liq muammo bor deb, masalani ortga tashlashdi. Bu muammoga eʼtiborsizlik ertaga biror-bir katta fojianing kelib chiqishiga sabab bo‘lishi mumkin. Chin dildan harakat qilishsa, mablag‘ masalasi ham hal etiladi-ku. Bu ko‘chalarni ochish uchun uncha katta mablag‘ talab qilinmaydi”, — deydi aholi vakillari.
Hudud vakillaridan yana biri Botir Hoshimovning aytishicha, ertalab va kechki paytdagi tirbandlik sabab ikkinchi tor ko‘chada umuman harakatlanib bo‘lmaydi.
Shu mahalladagi Mavluda Mirsog‘atovaning aytishicha, masʼullar hudud aholisini qiynab kelayotgan muammoga eʼtibor qaratib, yuzaga kelayotgan tirbandliklar va YTHlarning oldini olishi kerak.
“Ertalab, kechki payt mashinalar shunaqa ko‘p o‘tadiki, ularning shovqini, bir-biriga urilib ketishi bizning yurak hovuchlab o‘tirishimizga sabab bo‘ladi. Shu tor ko‘cha yuzidagi domda kasalligi bor, keksa otaxon va onaxonlar yashaydi. Buni hisobga olishlari kerak. Barcha ko‘chalarning katta yo‘lga chiquvchi qismini ochib yuborib, bizning ko‘chadagi mashinalar oqimini kamaytirishlari kerak. Shunda adolatli bo‘ladi”, — deydi Mavluda opa.
“Daryo” aholi eʼtiroziga sabab bo‘layotgan voqea yuzasidan Shayxontohur tumani hokimligi masʼullari bilan bog‘landi. Hokimlik vakili muammodan yetarli darajada xabardor emasligini, vaziyat bilan tanishib chiqqach, bu haqda tahririyatga aniq maʼlumot berishini maʼlum qildi.
Izoh (0)