Ўзбекистонда хорижий ОТМ битирувчилари ва илмий даража олган ёш мутахассисларнинг ойлигига устама қўшилади

Ўзбекистон президентининг 2021 йилдаги «Ёшларни ҳар томонлама қўллаб-қувватлаш ва уларнинг ижтимоий фаоллигини янада оширишга оид қўшимча чора-тадбирлар тўғрисида»ги фармони билан хориждаги нуфузли олий таълим муассасаларида таълим олаётган, илм-фан билан шуғулланаётган, етакчи компанияларда ишлаётган ҳамда юксак билим ва малакага эга бўлган Ўзбекистон ёшларининг ватанга келиб ишлаши учун зарур шарт-шароит яратиш, уларга уй-жой ажратиш, муносиб маош тўлаш бўйича янги тизим жорий этилмоқда. Бу ҳақда президент ҳузуридаги Давлат хизматини ривожлантириш агентлиги хабар берди.

Фармонга кўра, давлат органлари, ташкилот ва муассасаларида фаолият кўрсатаётган нуфузли халқаро рейтинг ташкилотларининг юқори 500 талик рўйхатига киритилган хорижий олий таълим муассасаларини (бакалавриат, магистратура) тамомлаган ёки уларда илмий даража (PhD ва унга тенглаштирилган бошқа илмий даража) олган ёш мутахассисларнинг лавозим маошига давлат бюджети маблағлари ҳисобидан қўшимча устамалар тўлаб бориш тартиби жорий этилган.

Қайд этилган қўшимча устамалар Давлат хизматини ривожлантириш агентлиги, ёш мутахассис ва унинг иш берувчиси ўртасида имзоланган шартнома асосида ҳар ой тўлаб борилади. Шартнома 3 йилгача бўлган муддатга тузилади ва тўловлар иш берувчи томонидан амалга оширилади.

Давлат хизматини ривожлантириш агентлиги томонидан шакллантирилган ойлик устамалар татбиқ этиладиган таълим йўналишлари, тор мутахассисликлар рўйхати, давлат органлари, ташкилот ва муассасалари рўйхати агентликнинг расмий веб-сайти — «Argos.uz»га жойлаштирилган.

Маълумот учун, халқаро эътироф этилган рейтинг берувчи ташкилотлар – Quacquarelli Symonds World University Rankings, Times Nigher Education, Аcадемиc Ранкинг оф World University ҳисобланади.

Халқаро эътироф этилган рейтинг берувчи ташкилотлар рейтингларида эълон қилинган университетлар рўйхати билан Таълим сифатини назорат қилиш давлат инспекциясининг расмий веб-сайти — «Tdi.uz»да танишиш мумкин.

Фармонга кўра, Халқаро рейтингда 1 дан 100-ўрингача бўлган хорижий олий таълим муассасаларини бакалавриат босқичини тамомлаган ёш мутахассисларнинг лавозим маошларига БҲМнинг 30 баробари миқдорида, магистратура босқичини тамомлаган ёш мутахассисларнинг лавозим маошларига БҲМнинг 40 баробари миқдорида, хорижий олий таълим муассасаларида илмий даража (PhD ва унга тенглаштирилган бошқа илмий даража) олган ёш мутахассисларнинг лавозим маошига БҲМнинг 75 баробари миқдорида устамалар белгиланган.

Халқаро рейтингда 101 дан 300-ўрингача бўлган хорижий олий таълим муассасаларини бакалавриат босқичини тамомлаган ёш мутахассисларнинг лавозим маошларига БҲМнинг 20 баробари миқдорида, магистратура босқичини тамомлаган ёш мутахассисларнинг лавозим маошларига БҲМнинг 30 баробари миқдорида, хорижий олий таълим муассасаларида илмий даража (PhD ва унга тенглаштирилган бошқа илмий даража) олган ёш мутахассисларнинг лавозим маошига БҲМнинг 60 баробари миқдорида устамалар белгиланган.

Шунингдек, халқаро рейтингда 301 дан 500-ўрингача бўлган хорижий олий таълим муассасаларини бакалавриат босқичини тамомлаган ёш мутахассисларнинг лавозим маошларига БҲМнинг 15 баробари миқдорида, магистратура босқичини тамомлаган ёш мутахассисларнинг лавозим маошларига БҲМнинг 20 баробари миқдорида, хорижий олий таълим муассасаларида илмий даража (PhD ва унга тенглаштирилган бошқа илмий даража) олган ёш мутахассисларнинг лавозим маошига БҲМнинг 50 баробари миқдорида устамалар белгиланган.

Мисол учун, Хитойнинг Фудан университети ҚС рейтингида 31-ўринда туради. Мазкур университетнинг докторантурасини битирган ёш мутахассисга БҲМнинг 75 баробари имқдорида, яъни 20,25 миллион сўм устама тўланмоқда. Бундан ташқари, Буюк Британиянинг Данди университети (University of Dundee) Таймс рейтингида) 201-ўринда туради. Мазкур университетнинг магистратура босқичини битирган ёш мутахассисга БҲМнинг 30 баробари миқдорида, яъни 8,1 миллион сўм устама тўланмоқда.

Фармонда қўшимча устамалар халқаро эътироф этилган рейтинг берувчи ташкилотларнинг ТОП 500 талик рўйхатига киритилган хорижий олий таълим муассасаларини 2021 йил ва келгуси йилларда тамомлаган ёш мутахассисга, яъни Ўзбекистоннинг «Ёшларга оид давлат сиёсати тўғрисида»ги қонунига асосан, ёш мутахассис — олий ёки ўрта махсус, касб-ҳунар таълими муассасасини битирган, таълим муассасасини битирганидан сўнг олган ихтисослиги бўйича уч йил ичида ишга кирган ва маълумоти тўғрисидаги ҳужжатда кўрсатилган ихтисослиги бўйича ишлаётганига уч йилдан кўп бўлмаган ўттиз ёшдан ошмаган ходимга нисбатан татбиқ этилиши белгиланган.

Бугунги кунда агентлик томонидан 21 нафар ёш мутахассислар билан устамалар тўлаш юзасидан шартномалар тузилган.

Аввалроқ Ўзбекистондаги 4 та ОТМ Буюк Британиянинг ёш университетлар рейтингидан ўрин олгани тўғрисида хабар берилганди.