Ўзбекистонда тўловларни амалга оширишда воситачилик ҳақининг чегаравий миқдори белгиланди, деб хабар бермоқда Адлия вазирлиги матбуот хизмати.
Март ойида президент қарори билан тўлов хизматлари кўрсатганлик учун воситачилик ҳақи тўлов шаклидан қатъи назар тўловчидан эмас, балки тўлов суммасидан чегириб қолиш йўли билан ундирилиши белгиланганди. Шундан сўнг Марказий банк бюджет ва корпоратив мижозларга тўловлар бўйича комиссия миқдорини чекловчи қарор лойиҳасини муҳокамага қўйганди.
Бенифициари бюджет ва корпоратив буюртмачилар бўлган тўловларни амалга оширишда тўланадиган воситачилик ҳақи (йиғимлар)нинг чегаравий миқдорини белгилаш ҳақидаги қарор 25 апрель куни давлат рўйхатидан ўтказилди.
Унга кўра, аҳолидан президент қарорида кўрсатилган тўловларни амалга оширишда ҳар бир транзакция бўйича тўлов хизматлари учун воситачилик ҳақининг чегаравий миқдори БҲМнинг 20 фоизи (66 минг сўм) этиб белгиланди.
Мазкур тартиб қуйидагиларга нисбатан татбиқ этилади:
- барча турдаги давлат божи ва маъмурий жарималар бўйича тўловлар;
- давлат хизматлари марказлари томонидан кўрсатиладиган давлат хизматлари, шу жумладан Ягона интерактив давлат хизматлари портали орқали кўрсатиладиган давлат хизматларига тўловлар;
- мактабгача, умумий ўрта, ўрта махсус, профессионал, олий ва олий таълимдан кейинги таълим, қайта тайёрлов, малака ошириш ҳамда соғлиқни сақлаш муассасаларига тўловлар;
- барча турдаги коммунал хизматлар учун тўловлар;
- Мажбурий ижро бюроси органлари томонидан суд ҳужжатлари ва бошқа органлар ҳужжатларини мажбурий ижро этиш бўйича ундириладиган тўловлар;
- “E-auksion” электрон савдо платформаси ва “К-Савдо” автоматлаштирилган ахборот тизимига тўловлар;
- авиа, темир йўл ва бошқа жамоат транспортларига чипталарни харид қилишдаги тўловлар.
Мазкур қарор 1 майдан кучга киради.
Изоҳ (0)